美食KOL呻酒店餐廳額外要水索價$90 批職員無事先通知收費 網民教路：下次要叫呢款水
發佈時間：17:14 2025-04-24 HKT
不少餐廳在食客入座後都會送上清水或茶，而早前一位美食KOL分享到酒店餐廳用餐，席間曾向侍應取飲用水，埋單時始發現索價$90，直指點單時職員並無告知要收費，亦未有在餐牌標明價錢，認為作為消費者未受保障。事件公開後，惟大多網民認為事主似乎欠缺在高級餐廳用餐的常識和禮儀，提醒事主下次記得要叫這款水？
美食KOL呻酒店餐廳額外要水索價$90 批職員無事先通知收費
在西式餐廳用餐，尤其是Fine Dining自有一套禮儀，以及約定俗成的規矩。一位美食KOL於網上分享到酒店餐廳用餐，表示席間曾被職員詢問「佢只係問我要咩水」，事主回答「still water（不含氣泡礦泉水）」，指職員當時沒告知需收費，亦強調自己「連幾錢都唔知」，就連餐牌沒有寫明。
當事主埋單時才發現一支礦泉水竟然收費$90，形容為「大癲」，更表示「唔覺特別好飲，我仲要只係飲咗2/3」。本來一個吐苦水的帖文於網上引起熱議，不少網民表示外國餐廳文化預設客人會叫飲品，「啤酒汽水又好，咖啡又好，水都係另外收費」。事主後來解釋在意的是並非價錢，而是餐廳未有標明價錢，或未有額外提醒客人，有感消費者未受保障。
網民善意提醒：下次記得講tap water
對於事主的用餐經歷，有網民表示不論是「still water」或是「sparkling water（氣泡水）」於高級西餐廳也屬於收費項目，如果不想付費喝水的話，「下次記得講tap water（水喉水）」、「酒店係呢啲價㗎啦」、「第一次去酒店餐廳食飯？」。有曾任職侍應的網民表示，經理曾指示「直接問still定sparkling，唔會同你講價錢」、「大排檔買支水都要（收錢）啦，得啲茶先係免費」。
有網民分享曾到意大利探望朋友，在意大利的餐廳文化中，「食飯買嘢飲是基本，最少買支水，唔買就唔禮貌」、「意大利連tap water都唔比揀，焗你still or sparkling」。有網民以酒樓作類比，認為酒店此做法正常，「酒樓都收茶芥啦，酒店食嘢嗌水要收錢好正常」、「你話咁樣做係餐廳夾你，去茶樓飲茶啲茶芥、小碟前菜咪仲屈，一坐低就硬掘有喎」。
文:RY
資料及圖片來源:lchaimleathercraft@threads、lihkg
延伸閱讀： 尖沙咀茶飲店天價$148熊仔冰茶！用愛瑪仕級別茶葉 網友一試呻智商稅 網民：百貨應百客VS行過望吓就算
