復活節｜港女落馬洲過境回程疑血糖低頭暈 遇上好心人3大幫忙 一原因網上出Po急尋讓座女｜Juicy叮
發佈時間：11:24 2025-04-21 HKT
復活節長假尾聲，入境口岸迎來回港人潮，期間上演了一則暖人心窩的小故事。3姐妹日前結束北上旅程，經落馬洲口岸入境，其中一人疑因為血糖低而頭暈不適，沿途遇上借凳、妹妹請食朱古力，和乘客讓座的3大幫忙。原本疲憊的歸途，都因為這些不期而遇的暖意成了柔軟的憶記。
消受了陌生人的暖意，滿懷「感激、感謝、感恩」之心的3姐妹還想借助網絡威力，聯絡曾在港鐵上熱心讓座且傾談投契的好心女乘客。詳情見下圖及下文：
港女落馬洲過境回程疑血糖低頭暈 遇上好心人3大幫忙逐張睇↓↓↓↓
樓主昨日（20日）下午在社交平台Threads發長文講述受助經過——
「尋晚4月19日，大約7pm左右，我與兩個家姐，三姐妹從落馬洲入境香港時，二家姐突然感到頭暈，疑似血糖偏低。我哋喺香港入境大堂問人借咗張凳，俾佢稍作休息。
大約幾分鐘後，有一位大約5-6歲妹妹，拎住一件KitKat朱古力走嚟俾我二家姐。我哋都覺得好錯愕，抬頭望到遠方見到妹妹的父母，妹妹父親點頭示意，妹妹母親就話：血糖低，食件朱古力呀。（滿滿嘅愛心）。
二家姐食了朱古力，休息咗一陣，好了一點。大約8pm，我哋試扶住二家姐搭港鐵去沙田。開始時，我哋想嘗試搵個關愛座，但發現關愛座坐滿了老人家。諗住行離車廂，再等下一班車。當刻，大家姐心想盡快送佢返屋企，就試下問一位女士，可否讓座。呢位女士好好人，好快讓出個座位，仲問使唔使要麵包，以補充體力。
我哋連聲道謝，沿途仲同呢位女士傾咗好耐。不過我哋喺沙田站落咗車後，有點後悔無問呢位女士拎IG（Instagram）。（我見你開IG俾相我哋睇時，我哋應該主動問你拎IG）如果有幸俾你見到呢篇嘢，麻煩你DM（Direct message，私信）我，以便聯絡。
呢兩件事都令我感受到，香港人嘅人情味仍在，感激、感謝、感恩。#第一次出Post（帖文）#人情味 #香港人#落馬州」。
樓主在回應欄補充：
•「其實家姐食咗朱古力後，都未係得。我哋買多樽汽水俾佢飲。抖咗大半個鐘，佢好好多。之後我哋先同佢上火車⋯⋯」。
•「嗰刻醒唔起。因為我同大家姐平時唔係搭火車回家的。尋日專登送二家姐去沙田先坐火車。同埋，電梯落去月台時見到係車尾位置，無想咁多上咗車了。我哋知道呢個女士應該係等咗兩班車先會有位坐。所以請咗佢讓位，我哋唔好意思，同埋都心存感激」。
相關閱讀：復活節．持續更新︱返港注意！周一截至早上10時 逾16萬人次出入境 港珠澳入境最繁忙
港女落馬洲過境回程疑血糖低頭暈 遇上好心人3大幫忙逐張睇↓↓↓↓
網民建議血糖低袋包糖
針對血糖低的問題，有網民建議「要袋住包糖就穩陣啲呀！」、「最好隨身帶啲糖，血糖低時好啱用」、「我都係有時會血糖低，所以我成日個袋都袋住啲糖」。另又人認為「血糖低暈咗就call（叫）白車啦，仲諗住逼港鐵？」、「呢個情況應該坐的士，會舒服好多。火車／地鐵人太多，太逼，空氣又唔流通」。樓主回應時解釋：「佢係想暈，企唔穩。如果真係暈低就緊係call白車啦」。
另有網民教路「下次有需要時可按緊急掣，去下一個站搵月台職員就會幫手，上MTR MOBILE（APP）各大車站資料和電話，話你依家喺第幾月台、第幾卡、第幾門」。樓主回應時指「知道呀。不過嗰刻二家姐已經好返啲，有返啲血色了。不過佢真係企唔到咁耐」。
網民讚：香港人嘅底子係好的
對於這樁好人好事，有網民指「世界好需要多啲呢種正能量post」、「好開心可以見到呢啲post，見多啲呢啲post就好」；並認為「其實香港仲係有好多好人的，只要有禮貌地問就一定得」、「香港人嘅底子係好的，今次之後，放定包糖在手袋裏面，有時自己用唔到，但有機會會救人用㗎」。
有人更加提醒樓主「將人哋嘅愛，喺遇到有需要嘅人時再幫幫手。讓愛傳俾下一位」，樓主回應：「是呀。我哋都好有禮貌請人幫忙的，我哋都勁唔好意思，同埋講咗好多次唔該晒」。
資料來源：cherrylvl＠Threads
相關閱讀：復活節｜網民過關後直擊福田口岸人海實況 旅客：準備來回頭尾都要同人逼
復活節長假伊始，4月18日早上是港人外遊的出境高峰期，旅客逼爆各個出入境口岸，放眼望去萬頭攢動。有經落馬洲口岸北上的網民，過關後拍攝到深圳福田口岸外的熱鬧情況。樓主今早11時21分在facebook群組「深圳大灣區好去處開心share」以「以1個多小時前的福田口岸」為題發帖，上載一段長約7秒的短片。
