全城一叮｜TVB小花跳辣身舞狂除3次衫 大騷長腿玩人肉風火輪睇到Bob嘩嘩聲
發佈時間：11:45 2022-10-07
無綫全新綜藝節目《全城一叮》昨晚首播，由林盛斌（Bob）、馮盈盈擔任主持，第一集請到蔡一傑和伍詠薇做嘉賓評判。節目延續昔日經典節目《殘酷一叮》精神，不過今次參賽者全為無綫藝人，賽制亦改由現場觀眾決定叮人與否，有七成觀眾撳「叮」，參賽者就即時拜拜。
【點擊睇逐格睇《全城一叮》】：
第一集有四組參賽者，第一組去年藝訓班同學黃瀅仴和吳兆麟表演拉丁舞加小提琴的歌舞劇，黃瀅仴兩分半鐘內換三次衫，更大晒長腿，跳拉丁舞亦顯得相當專業，而吳兆麟雖然是初學者，但亦跳得有板有眼，二人更挑戰高難度「人肉風火輪」，睇到伍詠薇、馮盈盈等拍晒手掌，成功入圍！
第二位參賽者是只得22歲的無綫新小花劉芷玲，表演跳舞的她表現平平，伍詠薇都睇到個樣悶晒，觀眾亦不賣賬將她叮走。劉芷玲即場爆喊，其追夢故事亦感到到評判蔡一傑，獲得復活之叮，有得留低進入決賽。
三位上屆港姐王嘉慧、梁允瑜及莫韻諰組成「飛天小女警」，三人在台上跳舞有氣無力，雖然接近淘汰邊緣，但性感上陣的她們有得留低，未被觀眾叮走。不過到講評語時，蔡一傑就落力大踩說：「我覺得你哋可以去拍《魷魚遊戲》，因為你哋三個跳舞都好似魷魚咁，軟弱無力，我唔覺得你哋係跳舞，你哋只不過係擺甫士。」伍詠薇亦跟着鬧，先指出着粉紅色衫的莫韻諰：「你第一個出場，企喺頭位，連企都未企穩！」
最後出場的王祖藍表弟孖八，老婆和囡囡亦有到場支持；他將表演演戲結合街舞表演，將個人經歷搬上舞台，主持、評判睇到企晒起身拍手掌。孖八在台上表示自己經常做路人甲乙丙，但他並不介意，更指最近透露考獲車牌：「咁啱《愛．回家》要人揸車，咁就有個位畀我揸車追大小姐同送水輝。」「送水輝」許家傑更到場支持孖八，上台攬實對方，大讚孖八即使只做茶客亦非常集中、好專心，場面好感人。
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
