賈曉晨愛情是甚麼？
發佈時間：00:00 2014-03-13
JJ賈曉晨最近簽了新經理人公司轉戰內地，更升呢做才女，為微電影《愛情是甚麼》兼任編劇和導演工作，好自然令人聯想到故事內容是她的親身經歷。JJ初出道被不少男士視為「女神」，前年突然傳出跟有同居女友及子女的樊少皇拍拖，還被指為小三，當然令不少男士大失所望。雖然這段感情幾經波折，但到現在兩人依然愛得甜蜜，她坦承轉戰內地為多陪男友，更表明結婚不會是很遙遠的事。
愛情是甚麼？JJ清楚不過。
賈曉晨去年離開陳百祥旗下經理人公司後，失蹤了一陣，以為她顧住跟樊少皇拍拖，早已無心戀戰，隨時準備做歸家娘，早前現身忽然做了編劇兼導演，由「女神」變身「才女」。
怕再執導演筒
JJ一直有寫作習慣，更愛天馬行空編故仔，但今次微電影的劇本，卻是專登為拍而寫，「我以前寫啲故仔係諗到乜就寫乜，可能會有好多唔合理地方，所以重新寫過個劇本。」為何選擇愛情故事呢？「因為容易感動到人，電影裏面有四個故事，係講唔同類型嘅人對愛情嘅睇法。」
JJ試過今次自編自導後坦言將來會更尊重導演，因為做導演實在太辛苦，「我以前都知道做導演難，但係拍完今次套微電影，覺得真係太辛苦，連搵地方到演員度期乜都關我事，體能上真係應付唔到，今次算係完成咗自己心願，將來做編劇無問題，但做導演就真係要諗真啲，除非拍MV呢類啦！」
視為結婚對象
男友樊少皇知道JJ開戲，自動請纓幫手，寫主題曲外，更客串演出，記者會當日亦有撐場，JJ不禁再補充，「佢始終拍戲經驗豐富過我，有時我諗唔掂都會請教佢，佢又會畀好多意見我。」JJ不諱言簽內地經理人，也是為了男朋友，「我想多啲私人時間，可以返內地同佢一齊，大家多啲時間了解對方。」
種種舉動JJ看來已嫁定樊少皇，她笑得極甜說：「好多人話我戀愛大過天，我真係咁嘅人，我每次拍拖都會視對方為結婚對象，所以一定要多啲時間相處先得，遠距離拍拖係唔得㗎！（有結婚計劃未呢？）咁又無咁快，啱啱先簽咗新經理人公司，咁樣對公司好唔公平，不過結婚都唔會係好遙遠嘅事。」
撰文：杜淑霞攝影：譚壹致
化妝及髮型：Karen & Ada
@ iMAKEUP WORKSHOP
服裝：2%
場地：The AIR
（The ONE）
