保鮮10年情醫生密友者牛扒冧Wyman

頭條日報-娛樂

更新時間：16:50 2015-06-19
發佈時間：00:00 2014-08-07

       早排純純兔馬賽變身野兔，驚爆穿上幾蚊人仔情趣內衣露點跳艷舞，之後更被前度TB汪（汪子琦）數臭，話馬賽母女搶錢，月索20萬仲要600萬養女費，「賽琦攣情」講金唔講心。不過娛圈都有出櫃藝人覓得有情人，好似填詞王Wyman（黃偉文）10年前已搵到個好男人，他與醫生密友吳偉民（Stephen）感情要好，經常被拍得結伴行街，有影皆雙。日前晚上，呢對同居密友歎完平民上海菜，仲拍拖逛超市，有默契地揀凍肉、醬油和牙刷等，儼如老夫老妻，估唔到外表斯文的Stephen原來係廚藝高手，見他揀完靚牛扒，仲同Wyman講如何烹調，家有廚神，唔怪得呢pair密友身形咁「幸福」啦！採訪︰李權威、譚壹致
      填詞人兼Fashion達人黃偉文，多年來一直與精神科醫生Stephen一起，二人交往逾10年，早已在半山同居。有雜誌曾到訪Stephen的診所，設計潮味，似cafe多過似診所，可見二人品味一致。日前晚上，身穿polo衫、短褲加人字拖的Wyman和西裝男密友一同去銅鑼灣的美味廚歎平民上海菜，二人點了湯麵、菜、餃子和酸辣湯等，快食半小時就由醫生密友埋單離開。男友等候埋單時，見Wyman細心拉開大門等密友步出，而Stephen行出門口望住Wyman時，即來個甜笑對望，好鬼sweet。
       Wyman撻拖行超市
      食飽飯，拖友就行過對面街的樓上超市shopping，手拎大皮袋的Stephen將一個紙袋放入購物車內，Wyman就有默契地推車揀貨。二人先分頭揀選凍肉，未幾Stephen手拎一盒和牛扒行埋Wyman身邊，向他講解煎扒過程，仲話就咁加海鹽已經夠味。揀完靚扒，二人並肩推車仔去揀醬料，其間Stephen快速聽完voice message後，即返回Wyman身旁，有傾有講再shopping。兩人將一堆調味料放入車內，再去揀牙刷。Stephen手拎兩支牙刷比對，聽完Wyman意見後就扑槌買其中一支，臨埋單前，二人發現有記者，Wyman即收起笑面急步衝向門口走人，剩低Stephen獨自找數離開。