不忿被飛出《鴨王2》 袁嘉敏嬲爆再踩我就搵律師
發佈時間：00:00 2015-09-25
30歲的袁嘉敏有樣有身材，揹飛露點拍《鴨王》成為焦點，衰在心高氣傲，引發連串是非，難怪會被王晶叮走，月底開續集換上聽教聽話的晶女郎文凱玲和唐紫睿，「晶哥話部戲講雞鴨戀，IIB級又無裸露，唔會係《鴨王》續集。」袁嘉敏坦言再拍裸露戲要睇劇本、對手、班底，唔會隨便再剝，又自爆跟王晶有私下密會，關係友好，至於舊相好何浩文Dominic的惡意批評，她就氣憤難平地說：「可能佢無話題又想見報，但那些說話真係好難聽，我其實好介意和唔開心，會成日喊，要Keep住睇醫生，之前覺得自己年紀大過佢，可以忍讓唔反擊，但長遠落去好影響我形象，所以我會交畀律師處理。」採訪：彭燕燕
攝影：沈灝南 場地提供：Topiary（電話：28666485）
《鴨王》收逾千萬票房，王晶當然會添食，但月底開工的續集就飛起袁嘉敏，改用上圍細一cup的文凱玲和唐紫睿揹飛，慘被飛起的袁嘉敏死撐話無問題，她說：「頭集尾段我已被Dominic開槍打死左，人死燈滅，無諗過會翻生。其實晶哥私下有跟我食飯，去過蘇浙同鄉會又試過好浪漫咁蠋光晚餐，晶哥一直對我好好，有才華又有風度，即係會主動為我開車門那種，我好enjoy這種感覺，而且每次都見佢着粉紅色、青色衫出來，明顯有花心思打扮，食飯會傾生活鎖事、心事，大家關係友好，搬新屋都有請佢來坐。」
「唔需要鬧到出面！」
講起王晶，袁嘉敏笑到蓮子蓉咁甜，但一提起Dominic就甚為不滿，回想當日被圍攻的慘況更眼泛淚光，她說：「唔想再被人利用來做新聞，有啲嘢唔需要鬧到出面，又唔係私底下有咩糾紛，我成日提自己，focus畀錢我的人身上，畀錢我的人係觀眾，唔係何浩文、Jeana、Hazel出糧畀我，可能佢喺無幾可出嚟做話題，覺得講我容易啲見報，同佢溝通唔到，總之今後任何人抵毀我、抹黑我的專業，我會出律師信再交畀傳媒，以正視聽。」
