Executive日記——星島集團盛事傑出領袖今晚誕生盧煜明教授跨界別跨世紀再奪殊榮

專欄

更新時間：04:15 2018-03-15 HKT
發佈時間：00:00 2018-03-15 HKT

　　今日係一個大日子，新一屆香港傑出領袖誕生﹗由星島新聞集團主辦嘅第二十四屆「傑出領袖選舉」，今晚舉行頒獎禮，表揚一班傑出領袖，最矚目嘅得獎者，係科學家盧煜明教授。Kelly知道，盧教授早於二○○○年已勇奪傑出領袖嘅「科研組別獎」，十七年後佢憑喺商界傑出成就，獲頒「工商/金融組別獎」，成為首位跨界別跨世紀嘅得獎者，締造新紀錄！
　　星島新聞集團自一九九四年起舉辦「傑出領袖選舉」，係每年城中矚目盛事，深受各界支持，得獎者都對推動香港發展有重大貢獻，係港人學習嘅典範。就好似盧煜明教授咁，佢係全球首位發現孕婦血漿內存有胎兒DNA，並發明產前無創診斷技術嘅科學家，憑卓越成就喺二○○○年獲得傑出領袖「科研組別獎」。其後佢創立雅士能基因科技及為早期癌症篩查嘅思為諾公司，帶領科研發展之餘，成功推動廣泛應用，喺醫學及商業上同樣表現出色，所以今屆獲頒傑出領袖「工商/金融組別獎」，成為首位跨界別跨世紀嘅得獎者！
　　除咗盧教授，今天誕生嘅本屆傑出領袖都喺各界樹立榜樣，並推動香港社會發展進步。佢哋分別來自「工商／金融」、「社區／公共事務／環境保育」、「教育／專業／科技及創新」、「體育／文化／演藝」，以及今年新增嘅「青年企業家」五個組別。
評審委員會成員份量十足
　　今屆嘅評審委員會成員都係份量十足嘅社會賢達，主席係周松崗爵士，委員就有陳永棋、陳南祿、蔡元雲、梁君彥、李國章、李國棟及徐立之。
　　小妹八卦到，今晚出席晚宴嘅嘉賓都係VVIP，政商界名人將雲集君悅酒店宴會大禮堂，由特首、司局長、到上市公司及各大機構嘅主席與CEO、各界專業菁英、名媛才俊，仲有娛圈名人、視帝視后……多到數唔晒！
　　「傑出領袖選舉」得獎名單今晚會隆重揭盅，想知晚宴盛況，記住密切留意《星島日報》、《頭條日報》、《The Standard》報道；頭條facebook仲會緊貼盛況即時提供第一手報道；明日《星島日報》會隨報附送「2017年傑出領袖選舉」特刊，有各得獎者感言及分享成功之道，以及各評審委員評語；而下周一至五喺《星島日報》內「每日雜誌」仲有得獎者專訪，一定要睇啦！
Kelly Chu