甩髮毒男變大隻型男吳業坤償願拍生髮廣告

頭條日報-娛樂

更新時間：04:56 2018-06-29
發佈時間：00:00 2018-06-29

　　去年吳業坤(坤哥)以九一分界all back頭露巨額兼「肥騰騰」身形拍攝劇集《誇世代》，除髮型受關注外，更被指跟C君（鄭詩君）撞樣。雖然唔係行偶像派，但坤哥都擔心頭髮會愈變稀疏，所以之前趁空檔向前輩歐陽震華密密請教救髮心得。近日，坤哥頭髮濃密咗，且操到37吋胸肌以大隻仔型男姿態殺入劇組拍《反轉貴利王》，仲拍埋止脫兼育發洗髮露廣告，有錢賺仲可以召喚頭髮歸位，坤哥表示好開心。採訪：方騫平化妝：Alfred@ Seven Sense 髮型：Nasaki
　　坤哥在九龍城一間已停用及轉為咖啡店的百年中藥店「大和堂」內拍攝生髮露廣告，因為冇冷氣，所以變身中醫學徒的坤哥簡單施展三兩吓功架介紹洗髮水成份，都搞到流晒大汗，拍到成身濕換來6位多數字酬勞，非常值得。坤哥仲話拍到夢寐以求嘅廣告好興奮：「8年前入《巨星》時曾經喺社交平台講過，我頭髮比較稀薄，又比同輩額高，瞓醒見有好多頭皮都有啲擔心，又怕腎虧，當時同自己講好希望有機會做增髮、頭髮護理代言人， O依家好正，Gel頭唔使驚，洗頭亦唔怕甩髮，廣告商老闆好好，除頭部按摩外，仲按摩埋我全身經絡，(家陣樣樣都好強？) 哈哈！未有機會樣樣試晒，但都精神咗，擔心少咗一樣嘢先。」另外28歲的坤哥仲的起心肝keep fit，努力做運動，成功減肥10磅操到大隻咗兼手瓜起𦟌。」
全靠陳志雲
　　坤哥接到洗髮露廣告間接要多謝陳志雲：「當年拍TVB第一個清裝劇《情逆三世緣》將頭髮梳到上半額好唔開心，好幾年後出席《超時空男臣》公開活動前巧遇陳志雲，佢知道我曾因髮線向上移喊咁口，所以介紹我去做治療，做咗成年好番好多順理成章就做埋代言人。」