潮店結業有空Gathering 徐濠縈滿足「分享症」猛影

頭條日報-娛樂

更新時間：04:17 2018-10-11
發佈時間：00:00 2018-10-11

　　Eason太徐濠縈，經營咗十年嘅潮店Liger上周正式結業，喺銅鑼灣店舖搞咗個結業派對，14歲囡囡康堤都有現身支持，非常熱鬧。唔使再落舖打躉做人肉生招牌，阿徐大把時間啦！日前一連兩日就被本報記者捕獲，其中一晚，阿徐悉心打扮約咗梁漢文太太Karen(林文慧)和另一靚太，去咗中環九如坊「食好西」。一向有「分享症」嘅阿徐，仲帶埋部專業相機，食物一上枱，相機食先備戰分享「彈藥」囉！
實體店與網店同時結業，阿徐話上年已有呢個決定，因為嚟緊想陪囡囡去外國升學，做跟得媽媽喎！加上做咗10年，想好好休息吓，佢話：「守業係幾大嘅考驗，雖然個關已過，但我身心俱疲，加上租約滿，正好休息一下。」無業一身輕，呢排阿徐不時出海玩wakesurf，大晒唔同造型嘅泳衣，而老公將於今個月27日在中環摩天輪底空地舉行慈善音樂會《LOVE IS LIVE》，話要回饋社會，老婆潮徐唯有自己搵節目啦！
　　日前happy friday，人妻相約好姊妹梁漢文太太Karen及一位女友人去九如坊歎新派歐陸菜。向來有「分享症」嘅阿徐，無論fashion、美食定靚景，乜都愛影一餐，再喺個人網誌打卡等人畀like。呢晚，人妻同兩位靚太飯局，唔單止衣着上鬥一番，阿徐仲自備咗部Leica相機，每逢美食上枱，都第一時間影相先。坐喺身旁嘅梁太Karen無佢咁好氣，一味食食食。三位精心打扮嘅靚太gathering兩個鐘，最後由圈外靚太請客。步出門時，三位阿太打扮出色，緊身Karen、黑衫阿徐，壓軸嘅圈外靚太穿上斜膊top，最搶鏡呢！
採訪 : 李維隆、梁志明