《逆流》上位唔再女尊男卑歐鎧淳胡子彤風騷拍拖

頭條日報-娛樂

更新時間：04:17 2018-10-30
發佈時間：00:00 2018-10-30

26歲泳壇美人魚歐鎧淳，與同齡嘅港隊棒球健將兼影壇新星胡子彤(Tony)拍拖兩年，女神月前喺亞運再創佳績，銳意挑戰2020奧運；男方則憑勵志片《逆流大叔》成功扒出人氣。日前晚上，呢對「體壇情侶」現身銅鑼灣鬧市拍拖。素顏鎧淳BB穿上吊帶Top，露膊好省鏡。見Tony陪女友睇化妝品時不時落力冧女，BB低頭甜笑，畫面勁sweet呀。
歐鎧淳自2016年於巴西里約熱內盧奧運擔任港隊持旗手，清純外貌靚出國際，被捧為「仙氣美人魚」，挾住人氣踩入娛圈，處女拍電影《春嬌救志明》，客串短短一幕即有份角逐金像獎「最佳新演員」，同去年憑電影《點五步》勇奪金像「最佳新演員」嘅男友星途相似，唔怪得咁啱嘴型啦！
Tony早前亦抽到支好籤，拍住吳鎮宇、潘燦良和黃德斌等好戲之人主演電影《逆流大叔》，片中四個hea男藉住扒龍舟嘅不死精神，搵番自己，票房衝1,500萬，更贏盡口碑，導演陳詠燊計劃原班人馬再拍。至於鎧淳BB亦有突破，在亞運取得佳績後接受咗另一挑戰，孖伍家謙飛咗去澳洲主持旅遊節目，佢興奮話寓工作於娛樂喎！
當街調情
日前晚上6時許，Tony唔使開工梗要陪吓索女友。當日鎧淳BB無化妝，束上半截辮加吊帶Top，散發仙氣。因為要應付幕前工作，鎧淳BB搵男友陪shopping，買咗袋護膚化妝品後，再去時代廣場化妝專櫃揀粉底和精華素。揀嘢時，熱戀情侶不時打情罵俏，男方猛用俏俏話冧女，女方亦非常受落，笑到冧滋滋。掛住風騷談情，鎧淳BB最終無收穫，雙雙走人。BB自動繞實大隻男友上樓，然後十指緊扣行去附近樓上餐廳撐枱腳。
採訪 : 梁志明