【Kelly Online】同光頭警長隔空駁火田北辰：係政府話有人造謠

港聞

更新時間：21:24 2019-11-28
發佈時間：21:22 2019-11-28

光頭警長微博原文。

有「光頭警長」之稱嘅劉澤基在反修例風波下儼如「KOL」，不時發文點評時政，言論惹火，實政圓桌立法會議員田北辰前日喺立法會上就不點名批評，有公務員在內地微博上公開批評特首林鄭月娥施政，及就區議會選舉結果造謠，質問公務員事務局局長羅智光「呢個Case，你點忍呀？」。「光頭警長」不甘示弱，在網上同田北辰開火過招。

「光頭警長」凌晨喺微博反駁話，邀請田北辰去睇下佢微博，質問佢喺邊度見到佢有講過，「林鄭根本不會從政執法。」、「林鄭我無法繼續支持他。」等言論。佢仲話，「作為香港選民，對數據中少了百多萬票作出疑問，不應該嗎？」，反問田北辰「提出疑問代表在做（造）謠生事嗎？」微博末段以「你（田北辰）曾是我心中一個十分欣賞的議員」作結，以示對田北辰的不滿。

田北辰期後於社交平台facebook回應，承認自己誤解咗當事人批評有關林鄭月娥施政的言論，但對於廢票的質疑，佢重申「唔係我話佢造謠，係政府個聲明話有人造謠。」，佢又重申，唔係針對任何人，作為議員只關心政府官員點執行公務員守則，現行機制會否有雙重標準，「係唔係喺香港講就唔得，係內地平台講就得呢？」