「一姐」靜晒自言難得放慢腳步菊梓喬嬲豬被指整容：化妝師手勢唔同

頭條日報-娛樂

更新時間：00:00 2023-05-17
發佈時間：00:00 2023-05-17

菊梓喬（Hana）相隔4年再於九展舉行個唱，人逢喜事精神爽，有得開騷連個樣都靚啲。之前她於澳門個唱中，因為現場音響出現故障導致耳膜嚴重受傷，Hana求診後出po貼靚相報平安，不過網民錯重點，指她驚現「間尺鼻」，Hana呼冤指每個化妝師手勢唔同，她根本冇靚過，最多只係化妝叻咗。

採訪：方騫平攝影：鄧國良
髮型：nicki_ting 場地：富薈旺角酒店

菊梓喬於本月20及21日舉行《Hanafinity演唱會2023》，Hana坦言4年來一直想開show，無奈受疫情耽誤，直至開關後，去年11月及今年2月才有機會分別到美國及澳門演唱，今次香港個唱都係突如其來，她快速於3小時內敲定：「o依家世事變化咁大，唔知會發生乜事，有機會我梗係𦧲飯應。」
讚吳卓羲o氹得人好開心

Hana同吳卓羲關係非一般，但她強調唔會邀請對方做嘉賓，亦只會安排家人睇show，問到屆時會否有「好消息」宣佈？她笑住耍太極說：「我會宣佈呢個show只係開始，因為公司幫我plan緊巡演。」雖然乜都冇預吳卓羲，但讚返對方係好搞笑嘅人，見到佢會好開心。

曾被封為「星夢一姐」嘅Hana，近年因為唱片公司人事變動少咗曝光，o依家由何麗全領導下的TMG改捧炎明熹、JW等，對此，Hana聲稱冇hard feeling，因樂壇要有妹妹、有哥哥才會百花齊放，她從不覺得自己係一姐，今年她主力做巡演。Hana聲稱小時候被父母遺棄，做童工捱大妹妹都過得到，明白到人生總有高有低，o依家又唔係冇得唱歌，難得有機會放慢腳步，她反而最介意被指整容，一定要解釋：「每位化妝師手勢唔同，懷疑當日未化完個妝就去見記者，所以個樣睇落有啲膠膠哋。」她唔介意素顏俾觀眾睇清真面目，前提係要有善長喺籌款節目中捐500萬落妝費。Hana自言唔夠靚都想整容，咁靚咗就唔使唱歌，做model影相都搵到食。