古星輝 - 5.5G專網推藝術科技應用 | 乜都5G
發佈時間：02:00 2024-09-20
好多時去睇戲、聽音樂會、睇話劇或舞台劇，入場後第一件事，主辦機構都會提醒觀眾熄手提電話，以免妨礙其他觀眾欣賞表演。但時移世易，當藝術結合科技，例如5.5G專網嘅出現，突破舞台嘅框架，將進一步玩轉欣賞藝術文化表演嘅傳統習慣。
嶄新視覺體驗
最近公司就同香港九大專業表演藝團之一嘅國際實驗劇團「進念‧二十面體」，計劃開創5.5G劇場。
我哋將於11月中喺香港文化中心大劇院，為「進念」建構專網，打造相信係全港，甚至全球首齣5.5G黑色話劇《唔講得》；將使用手機結合舞台劇劇情，演員嘅演出跳出舞台框框，帶來嶄新視覺體驗。
今次去欣賞舞台劇嘅觀眾，非但唔使熄機，最重要係開住個電話，先可以透過手機實時影像與演員近距離接觸。使用5.5G專網，網絡可以作分隔大眾使用嘅主網，運用獨立專網而唔受主網嘅使用所干擾，更好地管理網絡資源，充分結合舞台同科技應用嘅嶄新沉浸式體驗。
5.5G成劇場新元素
聽講以往喺表演場地，電話「收得到」同「收得好」都唔係好大問題，因為主辦機構都希望觀眾專心欣賞表演。但今時今日，由於藝術創作不斷演變，科技及多媒體應用日益普及，令高速及低時延嘅可靠連接，成為台、燈、聲以外，打破舞台劇傳統表演形式嘅基礎元素。
作為積極推動藝術科技發展嘅先行者，我哋一向好支持藝團作新嘗試。今次更以效能極高、傳輸速度可高達每秒20吉比特嘅26吉赫毫米波頻譜，喺尖沙咀文化中心大劇院，開創嶄嘅5.5G藝術科技體驗。根據網絡同事嘅測試，喺同一地方所得出嘅速度，比平日嘅5G快超過10倍。
《唔講得》由「進念」聯合藝術總監胡恩威改編與執導，著名美術指導奚仲文擔任造型設計，著名電影策劃、監製及經理人陳善之監製，並由金像獎影后葉童、資深演員黃德斌領銜主演。好期待即場體驗呢個創新應用，如何配合精采嘅舞台劇，為觀眾帶來劃時代嘅5.5G劇場。
和記電訊香港執行董事及行政總裁
古星輝
