大膽講 整容副業男人 周汶錡﹕我讀書時已月入十萬
發佈時間：00:00 2007-03-12
好多人都唔知道，周汶錡為人率直、處事認真，而且她EQ很高，跟她談話你會獲益不少，比如說起別人借她名聲作宣傳、掀罵戰，她會不怒反笑地指對方來意不善，置之不理方為上策。說到結婚生仔般人生大事，她會忍不住先撒嬌後表明其愛情至上的理念﹔我敢說，面對這位「性感女神」，你只好投降，因為她每一句每一語都會令你迷失。
撰文﹕黃栢高統籌﹕林永匡、彭燕燕協力﹕袁東亮、李子慧
Paco﹕自從周汶錡為無線主持飲食節目《原裝入口》後，人氣指數、曝光率直逼一線「姐仔」，看到她在節目中的出色表現，更使人對她另眼相看，估不到一個Model能夠有這樣的水準。
周汶錡﹕「其實以前啲Model只會教人扮靚之嘛，介紹飲食﹖我都算係第一個，可能我鍾意同人分享啦，食又得，玩又得，飲都得㗎，我都識好多，不過，有啲人覺得飲酒好壞，但我唔覺囉。」
再見電影圈
Paco﹕自從Maggie Q跳出模特兒框框，躍身荷里活成為影壇新星後，大批模特兒湧入娛樂圈，她們唱歌、拍戲、拍電視劇，各行其是，而周汶錡亦是其一，但自04年的處女作《戀情告急》後，便全無下文，難道她曾遇到不如意的經歷﹖
周汶錡﹕「我唔鍾意個過程囉，香港人好趕急，成日趕頭趕命咁，無溝通咁點拍戲啫﹖我都唔識古天樂，點做情侶﹖嘩﹗仲要一埋位就飲醉酒傾心事喎，點講呀﹖唔好玩啦，你一係灌暈我算啦，就算唔熟，經驗都要啩，你無經驗就埋位梗係唔得啦，我做事好認真㗎。」
賺錢好容易
Paco﹕近年，很多電影公司、娛樂公司老闆都向模特兒公司招手、挑選新星，令很多有質素的靚女都以模特兒作為她們事業的起步點，今時今日，我敢說，要找一個靚女真係唔容易，因為有條件的都被人簽晒。
周汶錡﹕「有時有啲嘢係貴精不貴多，一個已經夠，我記得92、93年開始入行，第一個廣告只用了30秒便完成，那時覺得賺錢真係好容易，後來我拍了很多廣告，都唔知點解會搵我，我嗰陣仲係肥妹，又未箍牙，爆牙都鍾意喎，可能係有觀眾緣啦，那時仍是讀書時期，但做Part-Time都有十多萬一個月，都幾厲害。」
愛情與麵包的選擇
Paco﹕我很欣賞周汶錡，因為她敢愛敢言，說到愛情，她會義無反顧地發表那段「愛情至上」的偉論，愛情與麵包，她會選前者，還會向你坦誠她的愛情觀。
周汶錡﹕「我好享受拍拖的感覺，以前我會為了愛情放棄一切，推Job唔做嘢，把所有時間留給他，但現在唔會喇﹗如果是一生一世的決定，我還是會選擇愛情，因為你搵到個好Partner，做甚麼事都會開心，唔會計較有錢定冇錢，唔通佢好有錢，但出面有廿幾個都得﹖我唔得囉。」
學習當小鳥依人
Paco﹕曾幾何時，所有男士不是希望身邊的另一半是小鳥依人般依偎着自己﹖但性格剛強的周汶錡卻大唱反調，坦言不懂「小鳥」般依偎男友、從不要別人的照顧。
周汶錡﹕「哈哈﹗小鳥依人﹖我仍在學習中，我知好多女仔好純、好乖巧，我唔係個啲囉，或許我已學懂互相尊重、互相照顧，我唔要男人照顧，有風度就OK，我唔想好似坦己咁要人照顧，我鍾意一路煮飯一路洗碗，我唔會用洗碗機，嘥水嘥電，洗碗﹖我五分鐘搞掂啦。」
笑談整容傳聞
Paco﹕很多人都覺得周汶錡愈大愈靚，我絕對認同，但卻因此而被人借作宣傳，「整容」之說，不脛而走，雖然如此，但她不怒反笑，並細心分析對方來意不善，解釋只會變相為對方宣傳，EQ之高，實在佩服。
周汶錡﹕「你估魔術師咩﹖其實阿媽年代已經好興整容，紋眉、整下巴，依家咪個個都硬屈屈，一舊二舊囉，呢啲真係好易睇到，蠟像人咁，我都希望啲人睇到我老﹔而且我根本唔識佢，做咩要講我﹖利用人做宣傳之餘仲要批評人哋，嘿﹗你有乜資格批評人哋先﹖唉﹗講多句都唔制呀，我對事唔對人，我EQ好豐富㗎，當初有人叫我搵醫生證明，我話使乜﹖不如叫佢哋搵咗證明先啦，點解要我搵﹖點解我要蝕底﹖不如你搵先啦，搵唔到就唔好講，收聲﹗」
即場睇﹕現場精采內容，可登入《頭條網》收看www.hkheadline.com
