羅鈞滿點醒女友張文采拍拖兩年半

頭條日報-娛樂

更新時間：16:44 2015-06-19
發佈時間：00:00 2013-07-26

       早前無線新聞主播張文采同黃紫盈內訌，張文采男友羅鈞滿（Moon）即發表「護花宣言」，力撐女友唔會出賣同事，否則點會跟上一位連真實名字都講唔出嘅三線藝人？羅鈞滿撐女本來很Man，但佢追咗個女神，宅男即狠評他「七線當三線」！曾自爆欠債數十萬的他能追到新聞之花，贏在有心：「我有真心而且性格正面，拍拖後仲感染到佢努力向上，佢由記者擢升為高級記者。」原來羅鈞滿仲係女友嘅明燈喎！採訪：方騫平攝影：畢紹基
      化妝：Alfred Tsang@AMEN production 場地提供：AMEN production CWB
      29歲羅鈞滿揚言四年內同女友結婚生仔，被指高攀新聞之花，他唔覺得兼自信地說：「雖然佢有好多人追，但其實佢對我冇安全感多啲，始終呢行五光十色，好彩我哋互相信任，互相鼓勵。女友同我一齊之後受我感染，變得努力上進，今年仲升咗職。佢真係冇乜是非同野心，內訌風波後，同事、朋友個個都好支持佢！點都好，件事都告一段落。」
      《星夢》多fans
      最近羅鈞滿跟《星夢傳奇》唱家班鄭俊弘惡鬥，阿Moon一出場，崔建邦即說「現場有幾百個阿Moon Fans」，他當日大唱譚詠倫的《暴風女神》唱得有型，可惜第五集Moon以161分排第4位，成績拉遠了。他說：「以前喺《天與地》做少年鼓佬雖然彈出，但大家仍然唔知我叫咩名，反而《星夢》好有滿足感。有次我踢完波沖涼，赤祼祼走出浴室穿回衣服，竟有觀眾上前跟我握手，鼓勵我要畀心機！嗰時好尷尬卻好感動。」