廣源邨兩車互不相讓爆爭執｜事主強調無響咹挑釁竟遭對方恐嚇 案件交反黑組調查
發佈時間：15:47 2024-08-13
沙田廣源邨一輛私家車準備駛離停車場時，被一輛平治私家車「頂住」，雙方互不相讓，最終爆發爭執。事主陳先生（化名）向《星島頭條》講述事件，指事發於上周六（10日）晚上，他駕車送親友回家後，經沙田廣源邨廣榕樓旁的無名路準備左轉入廣善街，駛至近路口時，突然有一輛白色平治私家車在廣善街右轉入無名路，阻擋其去路。他強調自己當時並無響咹挑釁，惟有兩人從平治下車，之後一直以粗言辱駡，聲稱要動手打人，並煽動6至7名疑似相識人士圍住車輛叫罵，「想用一啲唔合法手段威迫我。」消息指，案件現時交由沙田警區反黑組接手調查。
相關新聞：廣源邨停車場出入口兩車互不相讓 逆線男聲大夾惡爆粗狂罵：走唔走啊？
陳先生續指，對方一直以言語恐嚇，又舉起手機拍攝，令他深感不安，「不停話『X我老母』，大概講咗幾十次，跟住話會『打我老母臭X』，我覺得直程係想傷害我身體，所以我初初唔敢落車。佢又話『同你慢慢玩』，我覺得特登踩灰色界，想威嚇會搞我屋企人。」他稱，其後決定致電999報警，表明受威嚇，「警察係盡量想建議我和解，同埋想我簽和解協議書，不過我拒絕咗。」
由於擔心家人的安全受威脅，陳先生翌日到元朗警署報案，案件轉介至沙田警區刑事調查隊第七隊跟進，而網上流傳的片段則由車友上載，「噚日交通部有打過嚟問拎咗片，今朝話會轉介第二隊跟進交通嗰方面。」他認為對方不但違反交通條例更涉刑事恐嚇，希望警方嚴正執法，「將佢哋全部捉晒，起碼唔好令我擔憂我嘅人身安全，或者我屋企人會受到威嚇。」
現場單線雙程行車 街坊：啲車幾十年都係咁行
《星島頭條》傍晚到場了解，現場出口和入口原本分為兩條行車線，惟現時入口暫時封閉，僅餘出口可以使用，並設有臨時更亭，令所有車入邨時都必需單線雙程行車。記者在場視察半小時期間，發現所有沿廣善街上斜的車輛，都會在小瀝源村對開右轉，再駛入邨內，當中包括私家車、客貨車及消防車。
有居民表示當日目擊兩車爭路經過，指事主駕駛的寶馬離開廣源邨停車場，至近廣善街讓線位時，涉事白色平治從廣善街右轉，之後停在路邊待寶馬駛走，惟雙方其後發生口角，「架Benz話架寶馬都夠位出啦，我都無頂到你，但架寶馬就唔忿氣，覺得Benz有逆線，保安有嚟過勸交，叫大家一人少句，大家走到咪走囉，因為塞住後面啲車」。
該名居民又指廣源邨落成時，停車場有入及出兩條線，但多年前開始封閉入口，所有入邨的車輛都要單線雙程行車，無論消防車及救護車都是用同樣方法入邨，「住咗喺度幾十年，啲車都係咁行」。
