有片｜中年漢搭小巴狂食爆谷遭司機喝止 竟指「你吹得我脹呀」 同車乘客鬧爆
發佈時間：20:04 2024-11-15
車上飲食往往會引起不少爭議，有人會批評自私，但亦有人會認為情有可原。今日（15日）網上流傳一條長約7分鐘的小巴車CAM片，一名中年男子漠視司機多番勸喻，繼續我行我素食爆谷，甚至態度囂張表示：「我想問邊個位話唔可以食嘢㗎，你攞出嚟畀我睇？我而家係要食嘢呀！邊個位話畀我聽唔可以食嘢呀？你吹得我脹呀！」司機忍無可忍下決定停車，而車上乘客更一面倒指罵「爆谷哥」，「公共交通工具係唔食得嘢㗎啦，你識唔識㗎？你要玩嘢呀嘛，大家陪你玩囉！」
片段右下角顯示時發日期為周一（11日）傍晚6時31分，當時有多名乘客在港鐵沙田站的小巴站上車，其間中年男子坐在小巴最前排的位置不斷食爆谷，小巴司機稱車上不准飲食，「如果你要食嘢，唔該你落返車呀，我鏡頭影住你㗎」。初時「爆谷哥」有所收斂，將手上的爆谷收起，但小巴開車大約3分鐘後，「爆谷哥」拿出手機東拍西拍，之後更拿出爆谷大塊朵頤，令司機非常氣憤，要求他下一站落車。
「爆谷哥」隨即狡辯稱車上沒有標示寫明「不准飲食」，又要求司機拿出證明，司機立即表示：「要寫到明㗎？都無寫明要畀錢，你上車又畀錢？」，「爆谷哥」未有理會，更態度囂張稱：「你講乜嘢呀？我下站一定唔落車，你吹得我脹呀！真係成架車都無寫明不准飲食喎司機！我而家係要食嘢呀！邊個位話畀我聽唔可以食嘢呀？」
司機將小巴停在路中心，並致電公司交代情況，「有個乘客不停食嘢，我叫咗佢好多次佢都係咁食嘢，佢仲話架車無寫明唔畀食嘢，而家猛咁喺度嘈，你睇下點樣處理喇，我同佢講咗，佢仲不斷食嘢」。「爆谷哥」聽到司機向電話另一端交代事件，隨即再次出言「挑機」，「邊度有鏡頭呀？食緊嘢呀！你話喺度唔准食我咪唔食囉，咁係邊條例先得嫁大哥？你話好似地鐵咁寫住不准飲食咪不准飲食囉，你而家唔開車，即係畀群眾壓力我呀？我大把時間呀」。
車上多名乘客見到「爆谷哥」態度惡劣兼「串嘴」，紛紛出言喝斥，「公共交通工具係唔食得嘢㗎啦，你識唔識㗎」、「根據香港法例第374D章，車長有權拒絕任何違反規定嘅」、「你要玩嘢呀嘛，大家陪你玩囉」、「反正唔洗返工，咪陪你玩囉」、「你俾人擺上網係你自己XX咋」。
「爆谷哥」態度一百八十度轉變，突然向司機及其他乘客道歉，「你講得啱，司機大佬，我而家surrender（投降），因為我唔想你擺我上網，我掉咗去咁得未」，隨即將爆谷掉入旁邊的垃圾筒內，惟被司機喝止，「你唔好掉喺度呀，我個垃圾筒唔係畀你掉垃圾，你嘅垃圾自己帶返走，我無義務幫你清理，幾惹蟻幾惹曱甴呀」。
雖然「爆谷哥」最終將爆谷拾起，但向司機表示自己不滿意，「我就唔滿意㗎啦，咁點呀？我而家收埋去唔食，掉咗去又唔得，我而家同你say咗sorry啦，你又想點呀」。司機未有再作回應繼續開車，每當小巴埋站落客時，「爆谷哥」則向每名乘客「沙冧」道歉，「唔好意思咁多位，我同大家講聲對唔住呀」，片段就此結束。
有關片段引來多名網民紛紛留言，但各人的意見一致均認為「爆谷哥」的行為過份而且「小學雞」，指小巴司機一早已要求他不准進食，但仍然堅持己見，令人氣憤，「香港咁多法例，係咪下下都要寫出嚟貼喺當眼處先要遵守？」、「其實公共交通工具上都冇寫明不可隨處便溺，點解佢唔屙篤屎挑戰吓呢？」、「正宗ＸＸ鬼，又要大枝嘢咁小學雞，又要縮Ｘ仲想攞尾彩」、「人哋一開始已經客氣叫你唔好食」、「即刻上網揾同讀出法例嗰位阿姐好嘢」、「小巴一向有標明不准飲食」、「市面無大大隻字寫不可殺人，唔通又可以咩？」、「司機一開始已經同佢講咗，佢都仲係咁，仲唔忿氣特登玩嘢，唔只冇公德心咁簡單」。
