頭條戲場 - 《超時空情歌》美國黑膠版《想見你》 | 頭條戲場
穿越題材長拍長有，韓劇就特別鍾意，近期就有《背著善宰跑》，更令入行14年的男主角邊佑錫由3線變巨星。美國浪漫奇幻電影《超時空情歌》亦係玩穿越，唔係無時無刻回到過去，只會透過音樂跟過去連結，即係你聽到一首歌會諗起某個人或某件事，然後穿越去有關時空，即係台劇《想見你》啦？冇錯。但電影時間有限，劇情冇咁複雜，亦冇壞人阻住晒，就係一套圍繞音樂同記憶，深情又浪漫嘅愛情電影。（已上架）
撰文：廖思慧 劇照提供：Disney+
睇過一套戲、聽過一首歌、某個港鐵站等過一個人，甚至乎一句話都可以連結好多回憶。戲中女主角Harriet（Lucy Boynton飾）係音樂人，跟同屬音樂人的有型士Max（DCU的「新超人」David Corenswet飾）相遇音樂節，一拍即合繼而拍拖再火速同居，音樂人之家有大量黑膠，飯後餘興節目係黑膠碟循環播，調暗埋燈光，小小音樂世界加靚爆情侶，煙煙韌韌本來幸福到死。
好羨慕外國仲有黑膠唱片店
因為一個意外，Max走了，Harriet傷心到有情緒病，要去情緒支援小組聚會，藉分享去釋放自己，期間識到同病相憐的David（Justin H。Min飾），一個失去至愛，一個長別至親，互相安慰再行埋一齊，但最重要問題，Harriet會因為聽到某首同Max一齊聽過嘅歌，就會穿越去當時，由開頭好驚到之後習以為常，更可以隨意在穿越期間拔走所有播放歌曲的電源回歸正常。然後，Harriet有一個大膽諗法，就係想辦法搵返Max出意外時聽緊嘅歌，然後拯救佢。
電影Sell RomCom，係幾甜但一啲都唔Com，全片瀰漫憂傷，最慘女主角愛音樂，要靠音樂治療傷痛，但同時又怕工作時聽到某首歌回到過去，要長戴headphone保平安。故事簡單，有靚仔靚女睇，歌又好聽，好羨慕外國仍然有黑膠唱片店。由《初戀無限JAM》已經超鍾意女主角Lucy，戲中嘅佢着得有型又有味道，妝又cute，屬輕甜糖水愛情片，臨瞓前睇一流。
頭條戲場
