頭條戲場 - 《虎毒不》偽喪偶式的悲歌 | 頭條戲場
頭條戲場
2025-01-17 02:00
字體大小
4月放映的《虎毒不》，是新手媽媽悲歌，在兩性似乎平等的時代，去到「媽媽」這崗位盲點，人們就會避談。媽媽就應該「為母則強？」、就應該「失去自由？」、「以家庭為第一，為家庭犧牲？」這些美名是枷鎖。
撰文︰華朗
導演陳小娟（前作《淪落人》）在2019年生B做媽媽，這幾年感受尤深︰「未有媽媽呢個身份前，見到BB哭鬧，我直覺就係批判，『個媽媽點做嘢㗎？搞掂你個小朋友啦』。睇到悲劇新聞，有媽媽產後抑鬱傷害自己小朋友。做媽媽後，先感受到嗰種無力感。我小朋友都幾難湊，都會束手無策。」談善言演新手媽媽阿貞，晴晴初生，BB成日喊，嘈住丈夫一家與鄰居，又長期受奶奶「言語暴力」欺凌，說她「肯定你佗B嗰陣唔知食咗啲乜嘢，啲奶食到晴晴咁瘦」，諗起我好喜歡的一齣戲《史賓沙》（Spencer），一人一句毒舌diss死你（好想《虎毒不》彭杏英同《從今以後》許素瑩battle一下）。談善言稱︰「我同導演討論時，得知媽媽產後抑鬱有好多因素︰有賀爾蒙、產後復原問題，的確有喊唔停嘅寶寶，好難搞，即使你做啱所有步驟，佢都係喊；另一個係餵人奶，係導致產後抑鬱嘅重點。」還有缺席的伴侶，對方從不主動參與，這就是「偽喪偶式」帶來的問題。
本片是恐怖電影？
小野（盧鎮業）飾演阿貞的丈夫阿偉，只顧搵錢，不幫忙湊B，也不着緊妻子的感受。阿貞離不開阿偉，因當中有愛，男人是賤渣還好處理。本片像恐怖片，鉅細無遺去拍，只差未拍埋入產房zoom近鏡咇個BB出嚟。睇完好似仲聽到BB喊聲，就是有幻聽的人會出現的狀況，身不由己。早前「香港電影評論學會」對於「最佳女演員」的討論爭持不下，由《虎毒不》談善言VS《看我今天怎麼說》鍾雪瑩，談最終以1票之差力壓新科金馬獎「最佳女主角」，登上影后寶座。兩套戲我都看了，2人都是世一，好難揀。
頭條戲場
我唔知係咪「虎生猶可近」，「人毒不堪親」就肯定。
左起導演陳小娟、談善言、小野。
陳貞生完想繼續自己事業，卻受「傳統」枷鎖所困。
小野飾演阿貞的丈夫，話會努力搵錢，「第時生多個」。
網上孕照好靚，你睇埋阿談副body先講。
談善言飾演缺乏支援的新手媽媽陳貞，好少笑。
