李珊珊望以生命影響生命
索爆1996年港姐冠軍李珊珊，因患上驚恐症神隱多年，最近李珊珊打破隔膜，公開露面宣布復出，身形變大幾個碼的她，坦言haters集中笑她胖、變得像盧覓雪，但她覺得是「褒」，還講聲多謝！
1996年香港小姐冠軍的李珊珊，憑靚樣加魔鬼身材踏入演藝圈，可謂事業愛情兩得意，當時李珊珊曾參演劇集《烈火雄心》與錢嘉樂撻着相戀，更被稱為圈中的「金童玉女」，但兩人9年情最終玩完。之後李珊珊在2005年開始減產，更一度傳出患腦癌及抑鬱症，直至5年前，李珊珊為「精神健康基金會」擔任「傳晴大使」拍攝宣傳片，首次公開承認患上驚恐症，並分享治療過程，但可見她身形變肥。雖然李珊珊公開承認患病，但一直保持低調，未有出席任何公開活動。去年10月，李珊珊宣布成立YouTube頻道「三坐山」（Mount Trio），但依然未有在鏡頭前現身，只是間中在鏡頭外發聲。
宣布復出的李珊珊，大方面對鏡頭無所不談，她表示推動力是認為這一生要好好活下去，不想再浪費時間，加上對情緒病有不少資訊可以和別人分享，何不做更有意義的事？「我這年紀都要識為自己打算，要有自己事業才可以『財富自由』，我知自己身體健康有問題，都希望有好嘅醫療畀自己，呢個費用唔少，我要自己叻、賺錢畀自己！」
過來人身份分享病情
神隱7年的李珊珊，笑言匿埋默默地在網上睇到好多資訊：「我自己出身喺呢個圈，從小亦好喜歡睇電影，睇得多自然會識點樣去製作，當然唔會專業到識點剪，但都知道分鏡及所有嘢，然後慢慢認識到自己都能應付到，先至咁大膽做呢個平台。」
李珊珊以生命影響生命，公開患上驚恐症，以過來人分享患病情況及治療。她指不少人對這個病認知薄弱，有共鳴或適當的資訊也很少，自己可以分享如何活過來及面對生活，反而覺得擴闊了眼界，「如果我唔識個醫生，就唔會接觸到咁好嘅醫療過程，我知道相比其他情況，原來我係幸福嘅一位，亦想為其他人爭取幸福，一定要過來人身份先分享到。」李珊珊以「艱難探索」來形容自己患上驚恐症，初時她不明白為何身體機能出問題，例如會屙嘔、呼吸困難、心跳好快、標冷汗等狀況，有瀕死感覺，原本想拖延睇醫生，後來情況越來越頻密要入院，當病發後會肚瀉，亦好頻繁發生，睇過腸胃及心臟專科，最後嘗試睇精神科專科，她說：「點知敲中呢科！嗰吓真係如釋重負，因為我終於搵到條出路有答案。」面對驚恐症，李珊珊坦言就算出門口都需要很大勇氣，現在也會有這情況出現，不過會跟自己說不要怕，要跟它共存，因為驚就會肚屙，但笑謂還好，網上頻道拍攝現場附近就有洗手間又設備齊全，現在服藥量相比最高峰時已大減8成。
甘比Sammi撐走出陰霾
李珊珊患病期間在好友扶持下走出陰霾，林保怡、鄭秀文、古天樂及甘比等都十分支持她，李珊珊說：「我唔知點解修來同船渡或共枕眠，遇到一啲朋友喺我最黑暗難行時候扶我，我覺得自己幸運，最大財富係朋友，如果呢個階段無這班朋友，我估我過唔到㗎！睇吓我有無一個時機多謝返晒所有曾經幫過我嘅朋友。」談到患病治療可有經濟壓力？李珊珊表示自己有基本財富，北京投資樓有斬獲，之後拍拖的對象也很負責任，對她很照顧，亦獲得朋友關照。
雖然身形明顯比以前肥腫，但李珊珊已做好心理準備面對負面留言，原本都心情忐忑，未知能否承受，當決定後已有心理建設，將面對鍵盤戰士或客觀陳述事實，但有傳媒報道後，感恩迴響超出預期，大家都很支持她：「雖然有haters，但都係集中笑我胖，好似盧宛茵或盧覓雪，但我要澄清盧覓雪好叻，人哋支筆搵好多錢，又照顧得好自己又識食，對時事有觸覺，所以話我變咗盧覓雪，係『褒』呀！多謝！」
生肖屬蛇的李珊珊，當年以比堅尼泳衣上陣，拍攝以「玩蛇」為賣點的瘦身廣告成為經典。談到今年犯太歲的她，復出是否想突破自己？她笑說：「我幾鍾意蛇，自己生肖有情意結，個廣告概念係我同代言廣告商一齊諗，話不如整條蛇呀！綵排時發現條白色大蟒蛇好慢，就不如整條生猛啲，就好激進地整條『過山烏』，但效果好好，我同蛇都好有緣份呀！」談到復出後可想拍戲？李珊珊以陳百強的歌詞回應：「你選擇人，人亦能選擇你。我响商業角度，我跌唔入佢哋標準入面，佢哋以傳統標準，但又唔會抗拒，主力做好平台先。」現時單身的李珊珊亦不抗拒找個伴，但笑言首先要令她有漣漪。
