古星輝 - 5G機械人身負重任 | 乜都5G
後疫情時代加強咗機械人技術喺各行各業嘅應用，大家喺日常生活中，都可能接觸過送餐機械人、運輸機械人、消毒及清潔機械人，以至機械搜索犬等。就機械人技術會否於未來取代社會上某啲職位，甚至取代人類等哲學性問題，暫且不作討論，我哋目前見到機械人配合5G應用，的確對大眾嘅生活有好大幫助。
最近，公司就「培育」咗一個足智多謀、任勞任怨嘅巡邏機械人；畢業後隨即加入一間電力公司，擔任「智慧管家」一職，肩負起24小時監察及巡查密閉電纜隧道嘅重任；透過5G高速低時延嘅特性，全面提升喺密閉空間巡查嘅效率，幫助確保供電設備嘅安全及供電可靠性。
5G打造「智慧電纜隧道」
講咗好多年，5G並非單純用於上網，5G配合其他技術，加上創新意念，有助提升各行各業嘅營運效率。就好似電纜隧道係輸配電網嘅重要部分，喺打風或惡劣天氣情況下，更須加強巡邏，確保供電設備安全。
我哋喺電纜隧道安裝咗5G接收器，令高速網絡訊號能覆蓋整條隧道。當大家要逗留喺安全地方嘅時候，「智慧管家」就可以發揮全天候工作嘅優點。佢身上有內置鏡頭及濕度、氣體及溫度感應器，可以擔任先頭部隊，探測電纜隧道實況，減低工作人員進入密閉空間工作時所面對嘅風險，同時又可以收集數據，即時以5G傳送到控制室作分析之用。
負責「培訓」機械人嘅同事話，喺幫助電力公司調校「智慧管家」嘅時候，做咗無數次勘察及評估。據講，入得去密閉電纜隧道工作嘅都係獲授權人士，佢哋要先上堂，考試合格先可以入去做嘢，依家有咗「智慧管家」，由佢入隧道巡邏就更加方便及有彈性。
總括而言，香港推出5G逾4年，好開心見到5G能加促機械人技術嘅應用，處理更多關鍵任務。隨機械人方案嘅使用逐漸成熟，加上人工智能嘅突破性發展，5G機械人配合及AI，有助提升工作效率及補充人手，「前途」可謂無可限量！
和記電訊香港執行董事及行政總裁
古星輝
