古星輝 - 「古靈精怪」的5G直播 | 乜都5G
![全港首個郵輪5G海上直播項目,為大眾帶來新的5G體驗。](https://image.hkhl.hk/f/686e386/0x0/100/none/06d5851e6f42a8bf37ecad6953f2d195/2024-07/1_2_34.jpg)
上月中,筆者與網絡部嘅同事,出席本年度香港藝術發展獎頒獎禮。好榮幸,我哋喺舊年贊助全港首個郵輪5G海上直播嘅項目,榮獲「藝術贊助獎」。我哋喺海上做5G直播嘅大膽嘗試,得到認同。
5G直播自推出以來日益普及,用四個字就可以簡單概括5G直播嘅內容及特色——「古、靈、精、怪」。
「古」:古典、古今中外
直播並非新鮮事,係5G為直播賦予咗新意義,常用於音樂會及藝術表演。剛推出時曾應用於寺院嘅「一念一花」音樂會,配合航拍,以360度全景4K高清直播至全球各地。仲有各種國際藝術展覽,以至於今年中樂團新樂季將舉行嘅鼓樂嘉年華及5G直播音樂會等,可見5G直播一直為全球觀眾帶來中西薈萃嘅內容及高清嘅視覺體驗。
「靈」:靈巧、靈活多變
應用5G直播方案,事前毋須作大型安裝,配備裝置方便易攜嘅高質素攝錄機、5G智能手機等即可;比起傳統嘅衛星直播同固網寬頻更加靈活及有成本效益,不受場地限制,室內戶外直播,海陸皆通。
就好似我哋獲獎嘅郵輪5G海上直播,就打破咗場地限制,喺海中心航行緊嘅郵輪上直播音樂表演,讓全球觀眾體驗與現場演出同步嘅聲畫。
「精」:精密、精彩絕倫
今時今日嘅5G直播,已經可以傳送高達8K解像度嘅影片,畫面細緻高清,對觀眾來講,極具現場感。若再配合推陳出新嘅頭戴式裝置,更能提升視覺享受。
最近市場上出咗一種可提供沉浸式聲畫體驗嘅空間運算裝置,雖然目前只有Wi-Fi支援,但假以時日有5G版本,配合埋5G直播,相信更能達到親歷其境嘅效果。
「怪」:趣怪、千奇百怪
創意係5G直播內容嘅重要元素,除咗音樂表演等一般應用,早前喺內地農村就有網絡商試用5.5G直播帶貨賣荔枝。簡單如農產品買賣,動用到尖端嘅5.5G直播,既有趣亦創意無限。
事實上,5G直播不僅為企業及藝術團體而設,亦適合補習社、教育機構及KOLs。直播仲可以加入即時網上售票、留言或捐款功能,開拓更多機遇。
和記電訊香港執行董事及行政總裁
古星輝