古星輝 - 兩大5G機王打對台 | 乜都5G

古星輝

2024-09-13 02:00

內容

對電訊業來說，每年9月都是iPhone月，全球期待的機王誕生兼開售。新一代機王日前公告天下，同日另一國產品牌亦公布全球首部三摺式螢幕手機「三摺王」，就連開賣日期都「撞到正」，正面向機王挑機。

　　今年iPhone 16系列作出幾大重要升級，外觀上螢幕大了少許，但話題集中在新增嘅相機掣，令整體操控更似相機，專業感大增，影相拍片都更加就手。筆者認為內涵方面更值得關注，首先整個系列都用上最新A18及A18 Pro處理器，加上記憶體容量劃一8GB，此兩項罕有升級相信是為即將推出嘅Apple Intelligence（AI）功能鋪路。

傳內地版缺AI　港版特別搶手

　　講到AI功能，始終係今次新作焦點之一，傳聞內地版本將會無法使用AI，故內地果粉或會轉向港版入手，隨時掀起一陣搶機潮。根據內地官網說法，內地版嘅AI功能需要待監管部門審批過後才可開通。至於港版用唔用到？網上有用家試過升級至iOS 18.2 beta，做少少簡單設定就用得到AI，不過留意中文版AI要到明年先會推出，屆時我哋會見到AI嘅真正威力。

「三摺王」逾500萬人預約

　　另一邊廂，國產品牌選擇同日公布旗下全球首部三摺式螢幕手機「三摺王」，挑機味濃。呢款機以「非凡大師」自居，論賣相認真駕勢，三摺式設計既可作一般智能手機操作，拉開立即變成如iPad嘅10.2吋平板電腦，甚至可配合鍵盤當筆電使用，值得留意佢個鉸鏈技術更可做到雙向摺疊，向內向外都摺到，屬於摺機界創舉；加上僅3.6毫米嘅手機厚度，話佢將平板電腦放入衫袋褲袋都絕不過分。

　　「三摺王」更有齊人工智能及天通衛星通訊等今年最熱門功能，新機已有超過500萬人預約買機，甚至已傳出場外炒價。兩大5G機王各擅勝場，絕對值得各位期待。

和記電訊香港執行董事及行政總裁
古星輝