KellyChu - 凱旋歸來 陳國基迎接大讚：香港嘅驕傲 世警會港警摘89金歷來最佳｜Executive日記
KellyChu
2023-08-09 00:00
字體大小
世界警察及消防運動會在加拿大圓滿落幕，經10日嘅賽事，本港紀律部隊組成嘅代表團斬獲238面獎牌，取得歷屆以嚟最好成績。部分隊員昨日就凱旋返港，獲政務司司長陳國基等到場迎接。司長就話，各位健兒今日嘅成績，係努力加毅力嘅成果，大讚佢哋係「香港嘅驕傲」！
警務處、海關、懲教署同消防處組成嘅代表團，日前喺加拿大舉行嘅「2023年世界警察及消防運動會」捷報頻傳，摘下89金、80銀同69銅，共奪得238面獎牌，成績係歷屆之冠。
部分成員昨午凱旋返港，陳國基、保安局局長鄧炳強、保安局常任秘書長李百全、警務處處長蕭澤頤同海關關長何珮珊就喺機場舉行儀式迎接佢哋。陳國基致辭嗰陣話，350多位參賽同事成績彪炳，令人鼓舞。
佢哋就算係疫情期間，依然艱苦訓練，所以今日嘅成績，絕非幸運，而係努力加毅力嘅成果，大讚佢哋係「香港嘅驕傲」！
今次世警會有超過50個國家和地區，約1.2萬名執法人員參加。港隊健兒喺田徑項目奪得最多獎項，連同半馬拉松比賽，共獲18金、18銀和16銅。其中警察田徑會跑手警司黃月枝仲分別打破女子5千米，及女子1萬米50至54年齡組別嘅兩項大會紀錄，取得5金1銀嘅優秀成續。真係好犀利！
警察田徑會主席總警司李仲華就話，好高興喺疫情後再次參加世警運，同全球各紀律部隊進行體育交流。佢形容，隊員咬緊牙關、迎難而上，最終不負眾望，展示非凡嘅實力。
Kelly Chu
最Hit
吉野家全日自助任食！免費任添白飯 任食3款前菜小食 甜酸椰菜蘿蔔/醬油金菇（附指定分店地址）
2024-12-18 15:41
陶大宇郭政鴻現身晚宴發生推撞被全程拍低 69歲前佳視花旦出手「解決」
2024-12-18 09:00
更多文章
