Jacky哥 - 煤氣公司響應全國生態日 多重舉措促進生態文明建設｜企業熱話
Jacky哥
2023-08-15 00:00
字體大小
今日喺國家設立嘅首個「全國生態日」，一直致力保護環境及生態嘅煤氣公司梗係積極響應啦！佢哋喺舊年11月就發布咗《氣候相關及自然相關指導文件》，成為香港第一間企業發布先行文件，回應「自然相關財務揭露工作小組」（TNFD）框架，而且檢視同披露煤氣公司及子公司港華智慧能源嘅業務對環境生態及生物多樣性構成嘅影響，以及帶嚟嘅風險和機遇，見到佢哋對可持續發展真係好有承擔啊！
煤氣公司今年仲將12個環保附屬委員會提升為16個環境、社會及管治（ESG）附屬委員會，並將密切關注TNFD喺9月公布嘅最終建議框架，以作出更全面嘅生物多樣性匯報。佢哋仲支持唔同嘅活動及計劃，希望提升大眾對生態文明嘅意識！例如自2017年起與綠惜地球一齊推行「植林優化計劃」，喺郊野公園種植本地原生品種樹木，提升植林區嘅生態價值同增加生物多樣性。煤氣公司嚟緊11月仲會舉行大型活動，希望教育新一代環保嘅重要性。
重視員工教育
煤氣公司都好重視員工嘅教育，喺上月舉辦咗香港生物多樣性博物館導賞團，等大家欣賞唔同動物嘅標本，了解保護野生物種對人類和生態系統嘅重要價值；最近又舉行咗二手義賣活動，鼓勵員工捐出未用過嘅物品義賣，將「重用」嘅環保理念推廣至工作場所，籌得款項仲會捐畀非牟利團體，好有意義啊！
港華智慧能源喺內地同樣積極推動環保工作，舊年就舉辦咗大型環保推廣活動，鼓勵員工實踐低碳生活，例如單車代步、參與植林及「地球一小時」等活動。另外，公司舊年亦有「藍碳保護」行動，組織義工到深圳福田紅樹林生態公園，協助清理園內嘅外來植物品種，保護紅樹林濕地嘅生態平衡。
Jacky哥
更多文章
