鄧達智 - 平靚正惜噪音煩｜智智樂GO
鄧達智
2023-09-08 00:00
字體大小
「慶春樸門」從名字開始⋯⋯
性價比極高，真心讚賞，要打分；絕對唔會低過95巴仙。可惜平、靚、正之外，還有：煩！
周邊師奶群不着邊際地嗌、沒成本沒內涵扯高氣楊的噪音，叫同一屋簷下的其他人客煩不勝煩。
位於深圳南山區萬象天地「慶春撲門」，連至挑剔的純素食達人Erica，都瞓身推薦兼任導遊親自帶隊。
萬象天地，誠深圳中產消費地段，外觀似倫敦臨水東面新發展區，不乏曼哈頓、新加坡或香港年輕才俊財經區域的縮影，兼備國內國際名牌店子，設計新穎新派食肆雲集；好多間富京都禪意一望而知高級餐廳。「慶春樸門」並非京都奈良庭院幽深，背負源自內地近年美食前茅把手杭州湖光山色，風景綽綽有餘；加入東洋禪味枯山水顯然畫蛇添足，不及西湖山茶園氣韻。
進入餐廳，風光貼地，乾淨俐落，不賣高深，眼前諾大開放式Open Kitchen，顧客瀏覽，偷師學習，悉隨尊便。
十分重要，廁所窗明几淨，比起香港高級食肆佳。香港食環署查牌嚴苛，要求食肆清潔衞生方面卻十分低，廁所尤甚。
員工年輕，十八無醜男醜婦，笑容可掬兼訓練有素，望之叫人春風滿面，未吃先醉！
食物盛載器皿簡潔怡然，擺設伶俐，色澤鮮明，入口味覺口感叫人喜悅，價錢從6塊錢一小盤涼菜，至比較高級、60塊錢黑松露石窩炒飯；真箇平、靚、正兼備，難怪中午前排隊等入席午飯、下午茶、6時未到等晚飯的人潮持續不散。
真可惜，這樣一間優質餐廳卻無私人房間設備；好幾個寬躺廳子，擺放桌子十數，人客數十至一百；當地中產客人頗為斯文，問題來自疫後蜂擁北上消費港客，當中頗多「兩蚊雞」乘搭優惠2元一程巴士到落馬洲口岸，過橋，之後長者車費全免搭地鐵，遊走深圳，想去邊就去邊。一貫港人茶餐廳或飲茶模式，放大喉嚨，唔係講，而係嗌交模式跟同枱人互嗌，噪音煩到真係頂唔順；誠一窩好粥幾粒老鼠屎！
鄧達智
最Hit
更多文章
