KellyChu - 與廖本懷回顧發展里程碑 《安居》紀錄片何永賢談公屋冷知識｜Executive日記
KellyChu
2023-12-14 00:00
字體大小
房委會喺1973年成立，為咗慶祝50周年，房委會就製作咗8集紀錄片《安居》，訪問推動見證香港公營房屋發展嘅重要人物、過往及現任房委會委員等，一同回顧過往里程碑。首集就有房屋局局長何永賢（Winnie）登場，同首任房屋署署長廖本懷一齊回顧公屋歷史。小妹睇咗預告片，發現好多公屋歷史以前唔知，好期待今個星期日首播！
《安居》周日晚上7點半起喺香港電台電視31首播，每集半個鐘。首集「民有所居」就搵到何永賢同廖本懷一齊回顧公屋歷史。Winnie話：「有安居之所，香港先可以穩定長遠發展。過去50年，房委會都係扮演咁樣嘅角色。所以好想趁50周年呢個機會，拍攝一輯紀錄片，介紹過去興建嘅屋邨、現時最新嘅建樓技術，等市民可以更完整咁了解房委會嘅工作及未來路向。」
廖本懷就提到，自己入職後首項工作，就係興建馬頭圍邨，並大談箇中感受；房屋局常任秘書長、房屋署署長羅淑佩亦喺片中現身，提到自己喺公屋長大，「細個嘅時候諗，我住公屋嘅幸福喺邊度呢？其實房委會咁多年都係為咗社會上經濟條件未如理想嘅市民，提供一個租金、設備合理嘅安身之所，呢個宗旨多年沒變。」
Kelly Chu
更多文章
