KellyChu - 西九海濱17至23日舉行 「平安號」打卡歌手獻藝 警方提子親子嘉年華同樂防騙｜Executive日記
KellyChu
2024-02-15 00:00
字體大小
為提高公眾防騙意識，警務處公共關係部會喺2月17日至23日，於西九文化區藝術公園海濱草坪-東面舉辦以防騙吉祥物「提子」為主題嘅「提子親子嘉年華」，屆時將有多件大大小小、多款造型嘅「提子藝術裝置展品」遍布草地，以及攤位遊戲和兒童故事時間，絕對係適合大人細路參與嘅親子好去處！
嘉年華活動費用全免，其中喺17日及18日更設「提子波波池」及「提子攤位遊戲」，適合一家大細參加，隨時贏走多款限量版提子紀念品。而一艘以「提子」及其他防騙吉祥物為主題嘅渡輪「平安號」，亦將停泊會場對開海面，希望大家齊齊打卡宣傳防騙意識嘅重要。
活動首日會舉行由香港教育大學幼兒教育學系師生會主講嘅兒童故事時間，主題係警隊最新發布嘅《提子與我：提防騙子》幼兒繪本，繪本結合教育本地幼兒嘅經驗及理論，利用色彩繽紛插畫，令小朋友理解防騙知識。讀書會設有遊戲環節，參加的小朋友有機會獲得最近推出嘅提子背囊。嘉年華現場亦設有攤位遊戲讓參與人士「玩遊戲贏繪本」。
人氣歌手炎明熹（圖）喺18日「提子海陸空大匯演」，夥拍 「提子」唱歌、玩遊戲，並介紹上述繪本；觀眾同日可與海上嘅「平安號」打卡，並欣賞到維港上空由1200架無人機呈獻嘅「提子幼兒繪本天空秀」，享受開心又有意義嘅嘉年華。
警方指，希望透過歡樂嘅氛圍，讓參與家庭能共享快樂時光，一起寓防騙於玩樂，為下一代從小建立防騙意識，共建安全城市。活動完結後，相關提子藝術裝置展品將送予幼稚園辦學團體，以支持幼兒教育，延續防騙意識嘅重要性。
Kelly Chu
更多文章
