KellyChu - 將保育理念融入傳統習俗 佛誕求福報 嘉道理農場倡植樹代替放生 | Executive日記
KellyChu
2024-05-08 02:00
字體大小
下星期三就係佛誕日，唔少教徒會喺呢個日子進行放生儀式，希望獲得福報同好運。嘉道理農場就呼籲應將保育理念融入傳統習俗，例如用植樹活動代替放生，因為放生當中牽涉動物買賣，好多動物往往係從野外捕捉而來，唔少更處於虛弱和生病嘅狀態，而呢啲動物嘅苦難，僅為滿足人類放生嘅目的。
嘉道理農場指，我哋經常喺新聞睇到有人將淡水巴西龜放生入海中，但好多時候，香港並非呢啲動物嘅原生地，佢哋喺野外嘅生存率偏低，外來物種更可能破壞本土生態平衡，影響原生動物嘅食物供應。
有啲動物會被捕捉及關入籠中以供放生之用，有違透過放生去幫助動物嘅本意，部分更會喺捕捉期間受傷或死亡，或於運送時因缺水缺糧而喪命，另外一啲被放生嘅動物，其實係由人工繁殖作寵物用，唔識野外求生，放生後存活率也非常低。
農場強調，喺購買動物放生前，應從保育及動物權益作慎重考慮。
農場建議，善信可用植樹活動代替放生，從培育樹苗成長嘅過程中分享生命喜悅，締造新嘅樹林更可提供地方畀野生動物攝食、棲息及繁衍，植樹培養出嘅感情同埋成功感，可以讓善信終生回味，比傳統動物放生來得更恆久。
KellyChu
嘉道理農場呼籲應將保育理念融入傳統習俗，例如用植樹活動代替放生。
更多文章
