KellyChu - 港鐵「多啦A夢」主題月台及列車 遊走輕鐵東鐵機場快線「追夢」 | Executive日記
KellyChu
2024-05-28 02:00
字體大小
上星期六喺維港夜空上演嘅「多啦A夢」無人機匯演，好評如潮，令全城掀起一陣「多啦A夢」熱，港鐵亦都同《100%多啦A夢&FRIENDS 巡迴特展（香港）》合作，噚日就喺屯門輕鐵兆康站，率先推出「多啦A夢」主題月台以及「多啦A夢」列車，小粉絲們喺現場興奮打卡，又大讚多啦A夢真係好得意！
港鐵表示，以特別法寶「100%朋友召喚鈴」為主題嘅三列「多啦A夢」期間限定列車，將分別遊走輕鐵、東鐵線及機場快線，而輕鐵兆康站係新界主要交通樞紐之一，其「多啦A夢」主題月台以深藍色為主調，並換上主題海報及裝飾，旨在令全港洋溢「快樂比天高」嘅盛事氛圍。
「多啦A夢」列車車門配上粉紅色，化身「隨意門」，車頭同埋車尾都有模擬「多啦A夢」嘅鈴鐺及紅色尾巴；車廂天花、吊環及座位亦有不同造型嘅「多啦A夢」身影。到場嘅市民爭先恐後同列車合照打卡，唔少人仲帶埋多啦A夢公仔，或身穿紀念T裇到場。
家長帶子女齊打卡
有小朋友放學後專程同同學趕到車站，佢哋見到「多啦A夢」都好開心，高呼「見到多啦A夢車！真係有多啦A夢喺度！」亦有爸爸媽媽帶埋仔女一齊打卡。
市民謝小姐直言：「呢排整個香港都有叮噹貓，大家影相時都好開心，今日嘅輕鐵好精彩」，又認為香港有唔少動漫迷，舉辦相關主題活動可活躍社會氣氛，帶動遊客訪港。
KellyChu
不乏爸爸媽媽帶埋仔女一齊打卡。
更多文章
