KellyChu - 導賞員沿路講解 全程約3小時 夜遊大潭郊野公園看珍稀物種 | Executive日記
KellyChu
2024-06-03 02:00
字體大小
香港向來畀人「石屎森林」嘅印象，但其實，有好多寶藏等緊我哋發掘。位於港島東部嘅大潭郊野公園，就隱藏着唔少珍貴物種，例如香港湍蛙、香港瘰螈、盧氏小樹蛙等。港燈同長春社就合辦「綠遊香港」計劃，即日起推出大潭郊野公園「水塘物語」線之「生態演奏廳」夜間導賞團，沿路有生態專家，同大家講解分享路上見到嘅各種珍貴小動物。小妹早前就有幸參加咗一次，又認識一個全新嘅香港！
導賞團以大潭郊野公園閘口為起點，行至郊遊地點（燒烤區），中途經過苗圃路段、大潭家樂徑河溪等。全程唔長，如果步行，只要約20分鐘。但夜間唔少兩棲動物都會喺呢度出沒，例如香港特有嘅盧氏小樹蛙、香港唯一有尾嘅兩棲類動物香港瘰螈、本港首次發現嘅兩棲類物種短腳角蟾及香港湍蛙、白環蛇等。唔少動物有天然「保護色」，好難用肉眼見到，所以導賞團會帶領大家沿路尋找並欣賞動物，每次耗時約3小時。
聽到係咪好吸引呢，導賞團即日起就可以喺「綠遊香港」網站報名喇！另外，香港野行創辦人兼首席導師蘇樂軒就提醒，夜晚唔少動物會行到人行道，佢哋體積好細，例如瀕危嘅盧氏小樹蛙嘅成年雄蛙，只有約1.5厘米，黑暗中很易被人踩傷。所以大家記得用電筒，確認前方沒動物。
KellyChu
導賞員會帶領大家沿路尋找並欣賞動物。
更多文章
