KellyChu - 周末元創方免費入場參觀 文創無界集結本地品牌 展出300作品 | Executive日記
KellyChu
2024-06-15 02:00
字體大小
小妹去旅行嘅時候，好鍾意買當地文創產品做手信，但原來香港都有好多極具潛力嘅文創品牌，正喺市場不斷深耕。由三聯文化基金策展嘅「文創無界」，就展出咗分別嚟自9位香港藝術家、設計師及9個香港品牌共約300件藝術作品及文創產品，大家呢個周末可以喺中環元創方The QUBE，免費入場參觀。
展覽分為4個區域，Zone 1「街畫」展示咗林雅儀同埋羅浩光嘅壁畫，佢哋透過獨特嘅個人風格，創作出充滿想像嘅城市空間，令人感受到香港不同文化嘅碰撞。
Zone 2可試玩由INDEX GAME開發嘅元宇宙遊戲，當中場景重現昔日九龍城寨，玩家需要逃出城寨以完成遊戲，消失咗嘅集體回憶，透過科技和玩味重回現實。同區有設計師阿寬和葉偉青（Felix）嘅art toys，其中阿寬嘅「三腳貓」通過有趣元素吸引小朋友，從而希望向佢哋訴說廣東嘅文化故事。
Zone 3就行「中國風」，其中長枱上擺咗許開嬌創作嘅「青花瓷蛋糕」，仲有乳豬、壽司同埋薯條漢堡等，後方有多款由林春菊和余嫿設計嘅中西合璧旗袍，以及插畫家楊德賢創造嘅兵馬俑「小秦」，呢個Zone盡顯中國古典美學與現代文化嘅交融創新，好華麗。
最後一個Zone係9個香港文創品牌嘅產品，包括原工作室、粵東磁廠、安量彩印製盒、ZXIS、OOObject、羅氏針織、ByLeona、衡建設計及Éphēlis。佢哋將香港曾經嘅傳統手工藝及工業技術，用創意升級成為潮物，保存文化同時實踐永續發展。
「文創無界」係從深圳文博會香港創意館移師回港舉行嘅展覽，策展人梁冠文指，香港館得到文博會嘅觀眾讚歎，團隊收獲意想不到反應，希望香港人透過今次展覽，亦可以欣賞到本地優秀藝術作品。佢話，雖然9位設計師有不同風格，但佢哋嘅作品都係「好香港」。
KellyChu
Felix嘅「香港重機」模型。
最Hit
劉嘉玲億元半山豪宅擺巨型聖誕樹 裝潢奢華似博物館 有BB後突變溫馨家園
2024-12-24 09:00
網民實測深圳蓮塘「盒裝燒肉」烚起狂發脹 港業界懷疑是「ＸＸＸ肉」｜Juicy叮
2024-12-24 09:32
更多文章
