胡慧沖 - 泰國親子遊 | 筆泰沖動
胡慧沖
2024-08-09 02:00
字體大小
對於某些朋友來說，去泰國旅行就係陽光海灘，有些就追求廉價美食和JJ Market的商品，有些追求米芝蓮大餐，甚至乎靚酒店靚Spa……但其實亦有人為咗醫療，甚至乎親子活動而到來。
唔係好多人知道，其實泰國喺親子活動方面做得幾好，有唔少地方適合大朋友小朋友一齊去。就以曼谷嚟講，唔少商場都有專為小朋友而設嘅車仔，可以畀小朋友坐喺上面，等家長們推住車仔Shopping，又或者有專為小朋友而設嘅廁所，更加不乏可以畀一家大細去玩嘅大型室內遊樂場。話說有一間叫HarborLand嘅大型室內兒童遊樂場，疫情之前喺芭堤雅開枝散葉，跟住好多地方都有分店。雖然疫情期間有受到影響，但估唔到疫情過後生意越做越大，除咗喺各區大型商場裏面都有佢哋嘅分店，嚟緊仲會開一個水上樂園，呢個地方可以畀小童中童去玩，亦都適合家長帶埋小朋友入場一齊玩。如果家長放心又或者唔得閒時刻睇實小朋友，甚至乎可以交畀工作人員陪小朋友玩，場內亦有飲有食，更加重要係地點適中，基本上曼谷各大鄰近BTS站商場都有佢哋嘅蹤影，除咗外國人，本地人都會去享用呢啲設施。
又或者家長們也可以去大型商場百貨，揀一啲國際名牌旗下嘅童裝、BB裝，等佢哋細細個就接觸名牌。雖然係歐洲名牌，但價錢都不至於超離地，當然亦都可以選購現時泰國好流行嘅泰服，等小朋友可以着住泰服影相打卡。所以話，親子旅遊喺泰國都唔係唔Work㗎！
胡慧沖
更多文章
