胡慧沖 - 一個品牌的誕生 | 筆泰沖動
胡慧沖
2024-09-13 02:00
字體大小
話說在大約二十多年前，有一間來自泰國青邁的按摩店，在曼谷Ratchada路一間車行上面開了小型分店，正所謂兄弟同心，其利斷金，此店一眾老闆都係親戚朋友、兄弟姊妹，之後因為經營有方，而且服務等各方面都吸引到遊客，所以分店越開越多，甚至乎成功衝出泰國，分店開到去其他國家（係爭在香港仲未有）。呢間按摩店當年更首創四手按摩，成為拿手招牌菜，之後又不斷轉型，例如變身Spa店兼售賣相關產品，亦開設了醫療美容店，甚至專門針對運動等肌肉勞損的按摩店，實行多方面發展。
唔講你唔知，作為一間泰國按摩店，佢哋竟然夠膽開埋日式溫泉！時至今日，喺泰國已有唔少日式溫泉，當然包括佢哋呢間，由最初青邁，到後來曼谷甚至乎芭堤雅都有，規模越做越大。可能有人會覺得「傻的嗎？」，泰國天氣熱得咁緊要，竟然大熱天時浸溫泉？你唔好理，芭堤雅分店早上10時開門，9時多已經有人排隊。而佢哋其實仲涉足飲食業，於青邁、芭堤雅、曼谷都有開設餐廳。
今時今日，一班創業元老、兄弟姊妹已經翹埋雙手，周遊列國歎世界，將生意交畀子侄打理，仲成為上市公司，呢間就係香港人都好熟悉嘅Let's Relax。提到Let's Relax，網上總有人會話服務唔好、手勢差云云，但事實上分店越開越多，亦不乏世界各地旅客同本地人幫襯。最新開設係位於較偏遠社區Bang Na的一幢建築物，裏面既有按摩，亦有溫泉及餐廳，主要服務對象正正係該區居民而非遊客，皆因區內住咗唔少富戶人家，對佢哋來講，專登揸車出市區按摩未免太費時失事，採訪當日便見唔少附近屋苑嘅富裕家庭來食飯。多年來此按摩店都算Keep到水準，亦不斷精益求精，當然十隻手指有長短，未必每位按摩師都頂瓜瓜，但起碼質素有一定保證。
胡慧沖
更多文章
