郭志仁 - 十四樓有女鬼 | 九宮格

九宮格

郭志仁

11小時前

生活專欄

內容

　　音樂人T先生在壞男群組分享一則「鬼故」，源自屋苑大堂保安員跟女住客對話。十四樓女住戶驚惶失措，走到保安員身邊，女︰「你最近夜晚巡樓，去到我嗰層，有冇聽到高踭鞋聲？」保安︰「十四樓？唔覺喎，喂，你唔好嚇我呀。」

　　女︰「你知我係法團成員，同鄰居都熟，平時冇人會晚晚凌晨出街。但呢兩個禮拜，每逢凌晨一點左右，就聽到有開防煙門聲，跟住就有高踭鞋腳步聲。」保安︰「凌晨一點……哦，我估到係咩事。」

　　保安員示意十四樓女住戶靠近一點，T先生扮作檢查信箱郵件，繼續偷聽鬼故結局。保安︰「你識唔識十五樓X先生，之前都做過法團。」女︰「做時裝生意嗰個？」保安︰「係呀。佢哋兩公婆住，最近太太好似去公幹，我有晚見到X生同個女仔入大堂，但就扮唔識，唔講嘢又分開𨋢搭，女嘅就去你嗰層。最近夜晚個女仔都喺十四樓走。」

　　女︰「哦，好彩唔係女鬼。唔怪得有開防煙門聲啦，原來佢晚晚都由樓上落嚟搭𨋢走。」偷情男女都愛自欺欺人，以為前後腳分開電梯就平安無事。

　　屋苑保安員跟公司秘書一樣，精通住戶背景行蹤，若要人扮不知，平日就好好跟保安建立良好關係，值得長線投資。

　　「我很關注瑣碎事情，以X光眼睛，把你靈魂望到很透明」林家謙 — 難道喜歡處女座

郭志仁