KellyChu - 持「旅客日票」無限次乘搭 HK1號觀光九巴 19蚊遊九龍17站 | Executive日記

KellyChu

23小時前

內容

九巴今日起推出全新巴士旅遊路線—「遊．九龍」HK1，以循環線行駛尖沙咀至九龍城。

　　近年內地旅客來港喜歡深度遊，除咗探索大街小巷體驗本地文化之外，藝術館同埋西九文化區呢類藝文景點亦好受歡迎。適逢國慶黃金周將至，九巴今日起開設HK1號觀光巴士，方便遊客出行。呢架巴士會循環行駛尖沙咀碼頭、西九文化區、黃大仙祠等17個站點，全程收費19蚊，持「旅客日票」可以無限次乘搭。

　　小妹平時都鍾意搭巴士四圍去，可以點到點直達目的地同時，聽住歌坐定定欣賞車窗外嘅風景，都幾寫意，相信對於嚟香港觀光嘅遊客而言，都係一個唔錯嘅公共交通選擇。

　　九巴今日起正式推出全新巴士旅遊路線—「遊．九龍」HK1，以循環線方式行經尖沙咀碼頭、西九文化區、佐敦、油麻地、旺角、太子、深水埗、黃大仙及九龍城，全程共17個站。服務時間為周一至周五上午10時至下午6時；周六、日及公眾假期上午10時至晚上8時，每30分鐘一班。

　　HK1號車費19蚊，比一般巴士稍貴，有興趣會遊九龍嘅旅客，Kelly就建議買返張「旅客日票」，享受一日內無限次乘搭。「旅客日票」可以喺九巴手機應用程式App1933嘅eCoin內買到，適用於全港逾450條路線，每張55蚊。另外，持有「九巴月票」嘅市民亦可以27折優惠即$5.1乘搭HK1號。

　　九巴表示，HK1號車上設有普通話廣播以及途經景點嘅文字介紹，日後會逐步引入其他語言，協助旅客更了解本港旅遊特色。

KellyChu