胡慧沖 - 一個喜歡幪面超人的達人 | 筆泰沖動
胡慧沖
2024-10-04 02:00
字體大小
旅遊達人應該係講旅遊，但今次竟然唔講旅遊而講個人喜好。返嚟香港工作幾日，正經事唔做走去追星……真係大細路！
講緊嘅唔係韓星或者係明星，而係幪面超人呢一個家傳戶曉嘅超級英雄！自小都係佢嘅粉絲，知道便利店有佢嘅杯賣，一早已經託朋友買咗幪面超人1至3號嘅杯，返到嚟香港之後又想再搵多隻3號，結果由旺角搵到尖沙咀都只係搵到1號、2號……諗住放棄，結果又唔忿氣，某一個晚上又由九龍城搵到落去深水埗，大多數店舖都話沽清，有啲偶爾仲有2號，但想搵個3號真係一杯難求，追到我氣咳……
另外仲有就係專誠去採訪幪面超人50周年展覽，仲要專登喺泰國帶定相關服裝扮埋幪面超人去影相！自己睇得開心拍得開心，完全活在自己嘅世界之中，不理世俗眼光，仲要花錢買埋好多紀念品，又不斷在1:1公仔面前影相打卡，完全忘記晒自己咩年紀，更唔理會大會公關嘅感受擺埋變身甫士扮影相！
無他，因為我鍾意幪面超人，而且咁大型嘅展覽冇乜幾可可以喺香港舉行，仲要呢個50周年展覽離開日本第一站就係香港，再加上場內一次過有超多紀念品，場外亦有便利店嘅杯，簡直裏應外合，所以令自己的瘋狂情懷脫殼而出！
還有幫香港一個著名的迷你倉拍宣傳片，亦都扮作幪面超人，同佢哋高層一齊玩變身，然後興高采烈地拍片介紹自己嘅幪面超人珍藏，講到眉飛色舞，完完全全有如一個大細路！
今次實在花費了不少心思、金錢和精神在這些幪面超人之上，但都是值得的，因為如此機會實在可一不可再。
胡慧沖
最Hit
更多文章
