Cally - 一粥麵×李錦記 千人「馬拉松式」品嚐煲仔飯 | 商界講呢啲
Cally
2024-10-05 02:00
字體大小
依家啲「孖屐亭」活動真係愈做愈癲，我明嘅，鬥吸睛吖嘛！就好似最近一粥麵就聯乘李錦記舉辦「火力全開！鮑魚煲仔飯千人挑戰！」活動，為咗宣傳新產品「鮑魚臘腸滑雞煲仔飯」，竟然邀請咗成1,000位參加者嚟「馬拉松式」品嚐煲仔飯，為本土美食創下首個世界紀錄，我感覺係：堅勁！
咁大壇嘢，當然全員出動啦！當日出席嘉賓包括大家樂集團執行董事羅德承、首席執行官梁可婷、總經理（一粥麵及米線陣）鄭惠真、李錦記企業事務執行副總裁孔君道、副市場總監黃諾行、領展首席營運總裁（中國內地除外）卓格理，以及香港租賃董事總經理霍業生等等，眾人一齊主禮啟動儀式，為活動揭開序幕。
大會將整個活動分為6個場次，參加者即場品嚐「鮑魚臘腸滑雞煲仔飯」，現場更有人氣女團Lolly Talk演唱《一把火》同其他熱門歌曲，呢把「火」真係燒到現場冚冚聲，相當熱鬧！
台上精彩，台下都唔遜色！有本地藝術家Noble Wong以香港90年代的經典背景，創作出具有本土特色嘅手繪打卡牆，以及放大版嘅鮑魚臘腸滑雞煲仔飯主題裝置供人拍照留念；樂富廣場亦掛滿由鄰舍輔導會賽馬會大埔北青少年綜合服務中心的一班青年以「香港地道煲仔飯飲食文化」為主題嘅木牌設計作品，整個活動搞到有聲有色！
原來今次活動嘅首場門票係早前公開發售嘅，俾顧客購票到場參與盛事，而慈善場門票嘅全數收益將會捐贈俾鄰舍輔導會；而第二同第三場活動更邀請到400位來自鄰舍輔導會嘅服務對象一齊參加，為有需要人士帶嚟歡樂，一舉多得！
大家樂集團首席執行官梁可婷表示，一粥麵同李錦記都係本地土生土長嘅品牌，啱晒一齊推廣香港地道美食，Cally都好贊成呀，今次啱晒合尺啦！
最Hit
更多文章
