KellyChu - 電車巡遊、3D光雕匯演等任打卡 旅發局「哈囉威香港」4大驚喜 | Executive日記
KellyChu
2024-11-01 02:00
字體大小
旅發局早前宣布推出「哈囉威香港」宣傳推廣，為市民和遊客送上一系列萬聖節驚喜。昨日嚟到正日，全城嘩鬼紛紛出動打卡，投入精彩萬聖節夜。
旅發局「哈囉威香港」為大家送上4項精彩驚喜，包括派對電車港島巡遊表演、「南瓜車」免費派雪糕、「哈囉威香港」3D光雕匯演，以及港九街頭快閃表演。
其中焦點活動搶盡眼球，深受大人細路喜愛嘅可愛巨型南瓜、菠蘿包等，繼續現身香港太空館，上演「哈囉威香港」3D光雕匯演，富有香港特色嘅「吃貨」南瓜、帥酷DJ幽靈、熱情好客嘅菠蘿包、「夜鬼」銀河小子及派對常客蝙蝠先生，都喺現場現身參與光影派對！
昨晚6點至10點期間，「哈囉威香港」派對電車往返西環屈地街及銅鑼灣，車上一眾可愛「鬼怪」喺「叮叮」同大家見面互動，沿途帶動市民及旅客盡情投入慶祝萬聖節。「哈囉威香港」嘅南瓜造型雪糕車，更於晚上7點至10點，停泊喺中環8號碼頭（近摩天輪）免費派發雪糕，滿足大家味蕾及打卡欲望！
一眾穿上萬聖節應節裝扮嘅「嘩鬼」，昨晚亦快閃突襲銅鑼灣、中環及尖沙咀，為市民和旅客送上意想不到嘅精彩街頭表演，推高城中萬聖夜熱鬧氛圍。
此外，旅發局公布9月份訪港旅客數字接近310萬人次，較去年同期上升約一成，當中約半數為過夜旅客。累積計算，今年首3季嘅訪港旅客人次，按年增加近4成；其中訪港內地旅客和非內地旅客，按年分別多35%及59%。
KellyChu
更多文章
