KellyChu - 萬聖節生日出賽 熊貓裝纘鬼 何詩蓓先休息再決定奧運去留 | Executive日記
KellyChu
2024-11-02 02:00
字體大小
前日周四萬聖節係港隊「女飛魚」何詩蓓正日生日，佢當日出戰世界盃短池游泳賽新加坡站50米自由泳，以24秒00摘走銅牌，出場時更以一身可愛熊貓打扮進場，好應節！仲將新一面銅牌入袋作為生日禮物，Kelly祝詩蓓27歲生日快樂。
詩蓓喺50米自決賽出場嘅時候扮成熊貓，邊跑邊向觀眾揮手，現場亦傳出熱烈歡呼聲。熊貓裝扮嘅鬼馬照片昨日喺網上廣傳，獲網民大讚詩蓓真係好得人鍾意！佢賽後指，上星期喺仁川站比賽期間，已經諗住要做點事情，又咁啱見到熊貓服裝，於是萌生扮熊貓嘅念頭。佢感謝教練和團隊幫手，好開心最後能夠成事，形容今次經歷真係好有趣。
此外，詩蓓早前受訪時談到未決定是否參與2028年洛杉磯奧運，表示完成今站賽事之後，下個月會出戰布達佩斯短池游泳世界錦標賽，然後徹底休息3至4個月，先再做決定。
詩蓓直言，挑戰下屆奧運將會係人生重大決定，所以需要時間找出對自己最好嘅選擇，又說自己已經不再年輕，只會喺有信心可以與世界頂尖選手競爭下才出戰。
KellyChu
何詩蓓在決賽前裝扮成大熊貓出場，並在50米自由泳摘銅。
更多文章
