KellyChu - 主打港式雞尾酒聖誕等你飲住歎靚景天星小輪「STAY」全港首間海上酒吧 | Executive日記

KellyChu

2024-12-21 02:00

內容

　　天星小輪開設全港首間海上酒吧「STAY」，將於聖誕節當日正式營業。「STAY」主打具香港特色雞尾酒及供應多款酒水，船上仲有原漿啤酒以及韓國美食。迎着海風，邊歎美酒佳餚，邊欣賞維港靚景，絕對係同愛人好友共度佳節嘅好去處。

　　「STAY」12月25日正式開業，之後逢星期五、六及公眾假期，晚上8點至凌晨2點，都會喺尖沙咀天星碼頭4號碼頭營業。酒吧主題「STAY」除咗寓意天星小輪停泊於碼頭，亦係希望大家願意為自己騰出一些時間和空間，偶爾放慢腳步，觀賞維多利亞港嘅景色，在忙碌嘅生活中好好休息。

　　酒吧主打具香港特色雞尾酒，其中「Stay home」係以茶餐廳凍檸茶為靈感嘅雞尾酒；「Stay thoughtful」則係一款暖雞尾酒，配合各種不同香料做出mulled wine，只喺聖誕限定供應，冬日窩心之選。

　　船上設有多個打卡位和無敵海景，可容納多達110人，亦歡迎預約舉辦私人派對或商業聚會等等。而呢間亦係一間「無煙酒吧」，希望為市民打造健康周末好去處空間。

　　可以喺受港人遊客歡迎又具歷史意義嘅天星小輪上把酒言歡，同時享受維港海景，實在係樂事一樁，記得約實身邊人去體驗喇。

KellyChu