KellyChu - 創辦「愛望基金」 營運3年 鄭志剛挽救近200精神困擾家庭 | Executive日記
好多人都無為意，有一個非牟利機構「WEMP」（即Wellbeing幸福感、EQ情商、Mental Health精神健康、Parenting家庭教育），中文叫「愛望基金」，由一批商界精英、學者、社工、心理學家、教育界等人士組成，過去3年來協助近200個受精神困擾兒童同佢哋嘅家人，走出陰霾，甚至消除自毀嘅念頭。呢項義務工作，發起人就係鄭志剛（Adrian）。
「愛望基金」網站開宗明義引述Adrian嘅主張︰「今天的孩子就是未來的領袖。精神健康對所有孩子都十分重要，我們應克盡己任去培育他們，讓他們在身心健康的環境下成長，共同創造充滿愛與希望的環境。」而同Adrian熟識嘅朋友，都會聽過佢一個比喻︰兒童與生俱來，心理唔會有問題，都係長大過程中環境所做成，甚至係來自父母，兒童心中有一個窿，會伴隨一生。
「愛望基金」首席執行官毛迪生同傳媒講，佢哋透過社工、心理學家嘅深度介入，過去3年幫助近200個受精神困擾兒童同佢哋嘅家庭，其中一個極端個案，係通關後，一家之主嘅父親失業、太太抑鬱、子女精神受困擾，成家人捱餓，並有自殺嘅傾向，曾向醫管局和其他志願機構求助，但申請等候仲要以月計。「愛望基金」立刻行動，先捐款解決呢家人嘅溫飽，並提供精神輔導，將呢家人由自殺邊緣拉回來。
根據Adrian嘅想法，「愛望基金」不單止要喺基層家庭、幼稚園中小學等層面提供精神健康教育和輔導，還要聯同海外高等學府研究方法，紓解兒童嘅精神健康問題，甚至發展至成為一個國際性嘅服務提供者。
Adrian一向低調，上周以香港財富傳承學院董事會主席身份，喺被喻為「幣圈盛事」嘅「Consensus」大會上發言，講加密貨幣和數碼資產嘅趨勢，被商界議論佢喺離開新世界主要職務之後，或會再度活躍，但其實非也。知情人士指，Adrian覺得自己一公開露面就「好惹火」，即使聽從公關朋友係時候講下「愛望基金」，等多啲人關注兒童嘅精神健康，也交俾「愛望基金」嘅行政人員講，自己一於唔出面咁話。
KellyChu
