別讓自己後悔
嘉嘉，正職旅行嘉，副業打工仔。
2022-01-18 00:04
字體大小
「真係頂唔順啦，我今晚食完飯返嚟， 12點都未夠，入房上一陣網，阿爸已經哦咗我10次叫我去沖涼！我咁大個人，有分數啦！
唔係第一次㗎啦，只要我早少少返，佢未瞓，佢就又叫我休息多啲又叫我唔好去咁多夜街！我真係照顧佢唔到喇，你又有一頭家，家姐，不如真係送佢入老人院啦！」家明喺電話度同佢家姐講。
兩姊弟商量完之後，真係送咗80歲嘅爸爸入老人院，雖然佢爸爸身體健康，會行會走，佢哋亦都幫佢訂咗一間單人房嘅老人院，但係老人家望落去，明顯落寞咗好多！冇幾耐，老人院話老人家沖涼跣親，要坐輪椅！再冇幾耐，老人家就去咗！
本來諗住將老人家所有嘢打包，掉咗佢就算，但係家明見到佢爸爸床頭櫃入面有個盒，佢打開嚟睇原來係爸爸嘅日記。
… …「家明不知什麼原因這麼喜歡阿里巴巴與70大盜的故事，已經連續三個星期晚晚睡前都要我講一遍這個故事，之後還問我為什麼暗號是芝麻開門這麼有趣！我是他爸爸，他的要求我會努力達到。而他的問題就算問100次，我都會答他… …
家明已經睇唔到日記下面寫乜嘢，因為眼淚已經模糊咗佢嘅視線。
