《IT狗》後記：飲熱杏霜係壞人? 蛋白杏仁茶又點睇? -懶人做法
之前劇集《IT狗》熱播，家有半個IT人，晚晚追看兼討論。我對IT零知識，印象最深的是熱杏霜。(劇中金句：飲熱杏霜係壞人！)
熱杏霜這東西很特別，如果你去餐廳點熱杏霜，同枱的人多會覺得你奇怪又老土；但如果是蛋白杏仁茶呢 (都是那陣杏仁味)?情況就不同了。不只一次，上酒樓食飯，尾聲時總有人嚷着要點蛋白杏仁茶做甜品。
杏仁茶用的是南北杏。南杏帶甜味，又叫甜杏仁；北杏偏苦，有少許毒性，所以煲湯煮食時用量會較少。南北杏有止咳潤肺功效，C9們常用它來煲湯補肺，至於要做杏仁茶，其實也不算難，只是做杏汁過程稍為麻煩一點，要浸、攪拌再隔渣，又懶又想食，今天同大家分享一個懶人做法：
材料：(約四碗)現成杏仁粉40g、牛奶300ml、水300ml 、冰糖10g(可隨喜愛甜度增減)、蛋白2個
將水、牛奶、糖加熱，慢慢攪拌至糖完全溶化；然後加入杏仁粉並不停攪拌，以免結塊。
加入蛋白，輕輕攪拌3、4下，蛋白半熟可熄火，杏仁茶的熱力可將蛋白煮熟而保持滑溜。
這個做法非常簡單，很適合想食甜品又想偷懶的C9們！
懶人版節省了處理杏汁的步驟，在超市、食材店等都能買到杏仁粉。買時要注意成份，上面這款是100%純杏仁粉，無糖。
另一款常見的杏仁粉，含糖，做杏仁茶時要減糖。含玉米粉，做出來會略呈糊狀(我較喜歡這質感)。成份中有杏仁油，會香濃一點，但想要純天然成份的話就不適合了。
當然，自己做杏汁最天然有益，所以若時間充足，花師奶會用以下食譜做即磨蛋白杏仁茶：
材料：南杏 200g、北杏 10g、白米 10g、水 600ml、牛奶 500ml、蛋白 3個、糖適量
做法：
1. 南杏、北杏、米沖洗後加水浸泡最少4小時。
2. 浸泡後連水用攪拌機打至幼滑。
3. 以煲湯袋隔渣(可用手擠出所有杏仁漿)。
4. 杏仁漿加入牛奶和冰糖以慢火煮熱，慢慢攪拌至冰糖溶化。
5. 加入蛋白緩緩攪拌，蛋白半熟即可熄火。
貼士：想杏仁茶更「杰」身可略為增加米的份量
