英式美食｜移英朋友注意，炸魚薯條原來唔係嚟自英國
隨着愈來愈多人移民英國，社交媒體就經常出現呢樣嘢。
Fish & Chips，炸魚薯條，個個去英國嘅人都一定會食，兼且一定會貼出嚟，以示自己真係去咗英國。只不過，呢款全世界公認，儼如代表英國嘅英國國食，真正嘅起源，原來唔係UK，而係大西洋彼岸另一個國家，真係要搞清楚呀。
金黃炸漿，包住白雪雪嘅魚柳，配熱辣辣薯條，就係英國國食喇。
炸漿要落黑啤
搞清楚之前，先開始做炸魚薯條。識食嘅人都知，炸魚薯條最重要，唔係魚同薯條，而係用嚟炸魚嘅炸漿。要做出又鬆又脆嘅炸漿，材料一定要落足。嗱！開始嘞。麵粉混和自發麵粉，落少少鹽，打個蛋黃落去，加牛奶或者黑啤，少少油、適量水，咁就可以開始打漿。打打打，打到佢杰身，好似奶油麵糊咁。呢個時候，將兩個蛋白打至起泡，加埋入奶油麵糊度，靜置半句鐘，呢部分暫時搞掂，跟手可以整魚。一般炸魚薯條，都會用鱈魚，超市好多雪藏鱈魚柳，買返嚟就用得。解凍，兩面撲粉，放入麵糊裏面，全條都要蘸勻。燒一鍋油，攝氏180度左右。將蘸滿麵糊嘅魚柳輕輕放入滾油中，炸到魚塊浮面就翻身，再炸到兩面金黃即可。薯條呢，一係自己切薯仔，一係買冰鮮貨，放入油鑊炸起就得，超易。最後配醬料，英國人會配鹽、麥醋、豌豆泥，美國人、加拿大人同澳洲人，鍾意配茄汁同他他醬，但無論配乜嘢醬都好，一角檸檬係唔少得，食時唧落去，消熱氣又清新。
倫敦Camden Town嘅炸魚薯條，炸漿明顯深色，係重口味黑啤嘅功勞。
源自西班牙炸魚
好嘞！炸魚薯條搞掂，故事亦要開始講。
話說炸魚薯條早喺1860年就喺倫敦東區街頭出現，由一個猶太裔男孩約瑟夫‧馬林（Joseph Malin）發明，魚柳用薄漿包住炸好，加埋熱辣辣薯條用報紙包住周街食，係百分百街頭食物。因為太受歡迎，後來入舖，再發展到周邊地區。曼徹斯特的東北嘅奧咸（Oldham）嘅湯米菲爾德市場，就有一個藍色牌匾，標示該地是1860年代炸魚薯條店及快餐業起源。猶太裔男孩之所以會做呢種食物，同佢嘅祖先流徙有關。話說公元8世紀到12世紀，好多猶太人為逃避西班牙宗教裁判所審判，由西班牙避居於葡萄牙，本來生活平靜，宗教自由，直到1496年，葡萄牙國王曼紐一世娶咗西班牙嘅伊莎貝爾做皇后，惡夢就開始。伊莎貝爾唔信猶太教，亦唔鍾意猶太人，大肆驅趕佢哋，大量猶太人於是逃離葡萄牙，越過大西洋到英國定居。由於佢哋嘅祖先，早喺西班牙時代已經學識一種叫Peshkado frito嘅炸魚技巧，就連呢種技巧一齊帶到英國去。
加拿大漁夫，會用大西洋釣回來的鱈魚做炸魚薯條，十分新鮮。
變成全球美食
呢種炸魚，跟住猶太人飄洋過海嚟到英國，本來只係猶太人安息日嘅食物。估唔到由一個細路引爆，一躍成為風靡全英嘅美食。由倫敦東區街頭，到曼徹斯特的東北嘅奧咸，逐漸擴展到英倫三島各地。1910年，全英已經有超過25,000家炸魚薯條店，十年後更急升至超過35,000間，之後更出現炸魚薯條嘅大型連鎖店，星星之火，已經燎原。
其中最有名的炸魚薯條大型連鎖店Harry Ramsden，喺1952年就創出一日之內賣出10,000份炸魚薯條嘅健力氏世界紀錄，真係威過威士忌。更威嘅係，炸魚薯條熱潮，更擴散到美國、加拿大、澳洲、新西蘭等國家，並且大受歡迎，人人都盛讚呢種英國傳來的美食為英國國食，一直至今，深信不移。移民英國嘅朋友仔，以後有人問你關於炸魚薯條嘅嘢，你就背咗上面嗰段發展史俾佢聽，分分鐘好味過佢手上嗰塊炸魚薯條架！
Fish & Chips的店舖，不單偏佈全英國，甚至世界各地都有，已成國際美食。
