【行山】大嶼山塘福至伯公坳｜訪狗麻脊、狗牙嶺、一線生機、閻王壁、卡通鼠石、積木崖
4月19日 (星期二) 19~23度 天陰/有雨/大霧🌧🌬🌫
今日路線名同個"狗"字好配合👉爬呀爬，當然我哋無狗狗爬得咁敏捷😜😅又無狗狗身軀咁輕型，所以前半段路花咗好多時間去爬，加上有雨更加要小心慢爬，永遠將安全放第一位👍諗住後半段路應該有好日子過😅雖然唔駛好似狗咁爬，但就要用pat pat坐低瀡落去，有幾個位好直好跣🙈🙄係辛苦，但風景無限，有霧都一樣咁靚🥰如果你有興趣挑戰呢條路線，一定要評估自己能力，量力而為，最好有經驗朋友隨行。
1️⃣塘福至上山入口約1.1公里2️⃣上山口至狗牙嶺約1.4公里3️⃣狗牙嶺至小鳥回頭石約1.1公里4️⃣小鳥回頭石至鳳凰徑3段約900米5️⃣鳳凰徑3段至伯公坳約2.5公里。
路線：大嶼山塘福 ➡️ 狗麻脊(東東狗牙) ➡️ 狗牙嶺 (海拔539米) ➡️ 一線生機 ➡️ 閻王壁 ➡️ 小鳥回頭石 ➡️ 南巖棧道 ➡️ 鳳喙臺 ➡️ 刀片石(遠觀) ➡️卡通鼠石 ➡️ 積木崖 ➡️ 天窗脊 ➡️ 鳳凰徑3段 ➡️ 伯公坳 (約7公里/超慢行6小時連影相小休)
🚘東涌巴士總站乘11號大嶼山巴士 ➡️ 麻埔坪道口站落車 (約25分車程) 或 塘福懲教所落車(指定班次途經)
👇10：00起步🚶♀️🚶♀️🚶♀️落車後，巴士站對面走入麻埔坪道
👇麻埔坪道
👇呢1公里石屎路係全程唯一舒服路段😅
👇15分鐘後到懲教署，右轉入上斜路
👇唔使3分鐘見閘口，隨即左轉入塘福引水道
👇唔使半分鐘，右邊路口走入，上山啦，開始艱苦時段💪💪💪
👇落緊毛毛雨
👇路徑清晰，但不斷上上上，無平緩路，要去到海拔240米先好行小小
👇行咗20分鐘，有個影相位
👇水口灣
👇箭咀位置是一個小平台
👇有時都幾直😅💪
👇嚟到小平台位置了，小休一回，雨越落越密🙄
👇小平台的左邊路徑上走，仲有15分鐘路程到狗牙嶺
👇剛才休息的小平台
👇唔好睇小呢15分鐘路程，好多碎石，又無扶手位，只能烏低身爬呀爬💪
👇果然係行山高手，面不改容！👍
👇加油💪💪💪
👇旁邊的東狗牙嶺路線
👇11：50到狗牙嶺 (海拔539米)景觀唔駛講啦，用👀睇。狗牙嶺是個超開揚遼闊的平台，沒有標高柱，雖然大霧，但一樣咁靚🥰
👇朋友叻叻🐷比個👍👍👍佢
👇背後的山，一陣要爬的🙈
👇仲有一段路先到一線生機
👇好靚！！不過見到座山路咁直，尤其係接近山頂果段🙄有一刻想打退堂鼓，不過落山都唔係咁易😅決定繼續.....
👇我呢位攝影師算係盡咗力😜喺安全位置下捕捉靚人靚景🥰
👇朋友背後箭咀位置就是一線生機，之後沿右邊路徑走
👇估唔到上到嚟會咁多人😅
👇12：30到一線生機，亦係西狗牙嶺路線交匯點。落果陣係有啲驚驚嘅，只要坐低慢慢落就沒問題的，可以借助一下旁邊的鐵鏈
👇走過一線生機後，橫山徑走
👇都唔係咁難走啫😅
👇另一個挑戰，而家位置約海拔600米，要上爬至海拔780米的小鳥回頭石，這片山壁稱之為閻王壁😅
❇緊記重心向前，不要站立向後望，這樣好易失重心，尤其係畏高者，專心慢慢一步一步而上，唔好掛住打卡，所以我都無乜影相😜😅
👇三隻牙🦷🦷🦷
👇污糟貓😉😝
👇最後一小段斜路
👇遠處是小鳥回頭石
👇13：24到小鳥回頭石 (約海拔780米)
👇霧開始散了點
👇小鳥石旁邊下去進入南巖棧道
👇呢個路口比較難落去，左右兩邊都有可踏腳的石塊，腳長落去會容易啲，所以腳長朋友可先落去再協助隊友。
👇謝謝長腳朋友協助🥰🙏
👇嚟到呢邊，感覺氣氛唔同哂，霧散了雨也停了，景觀跟剛才的截然不同，這就是鳳凰山吸引之處，變幻莫測🥰
👇小鳥回頭石
👇之後的路都要小心謹慎，步步為營。呢嚿大石就係鳳喙臺，這邊睇甚麼也不是😉再走遠點望回就像了
👇大石旁邊是條直跣的路
👇無人幫到你，要靠自己坐低瀡落去😜
👇大石林邊穿插，路徑亦唔難辨認，只要有絲帶，路就走對了
👇鳳喙臺！真係要比個👍自己，喺咁複雜的石林下走過
👇刀片石
👇呢兩位仲勁😅👍佢哋腳下是一條石路
👇鳳喙臺，旁邊是剛才瀡落路徑
👇這個角度，刀片石變樣了😉
👇看似無路可走，其實跨過大石會有路的👍💪
👇小鳥石離我們越來越遠了
👇14：07到卡通鼠石
👇穿過石隙
👇穿過石隙後挨石壁走
👇小樹林中穿插及走過石河
👇積木崖👉唔經唔覺已走過積木崖下
👇到最後一個景點天窗石(左後面是天窗石，需要爬上去才見到的)，大家都有點累了，無力再跨上大石，所以在此影張相算.....
👇繞過天窗石堆前路徑後，往上走天窗脊
👇約20分鐘後接上鳳凰徑3段右邊走，要走2.5公里先到伯公坳🙄🤐
👇成身都係泥，返去有排洗😅
