李辰安 - 北上消費 分薄香港生意？ ｜辰來之筆
發佈時間：00:01 2023-08-29
有人話，搞死香港經濟，最好北上消費，我聽到之後，馬上約齊幾位好朋友，黃昏到小酒館一聚。
假日北上 周圍都係香港人
中環近日熱鬧中帶一點憂鬱，睇見銀行偉慢慢行過嚟之步行姿態，就係一圖勝千文，你見就知近日投資界有幾頹。「辰哥，走緊下坡呀，行到索晒氣。」我嚇到唔知點講。「乜走下坡，你咪行緊斜路上嚟。」之不過，佢真係頭耷耷，好似望住個地下行咁，但好嘢在佢能夠平衡得到。大師兄細細聲同我講︰「呢次個市好似幾反常，不過，又係意料之內，情理之中。」咁難明，不如入去飲杯先，張翁已經同靚仔侍應碧咸仔講波經，猛咁講，來來去去都係講美斯寶刀未老。
「我同你講，美斯現在去踢美國波，對手唔係歐洲班豪門，所以佢咪可以好輕鬆踢足球囉。」係噃，佢行下行下都可以控制全場，唔講唔覺，美斯已經進化到踢佛系足球。「即係少林足球，笑住嚟踢。」我想更正，星爺踢波好嚴肅，邊有笑笑口呢。
大家四個人又坐埋一枱，我馬上報告，都係唔好下個月一齊坐和諧號上廣州。「唉，第一個理由，周末、周日成半個香港都北上，四面八方都係人，所以不如諗下去第二度；再講，大家都應該有班人留港消費，你睇現在酒樓食肆，好似分薄咗好多。」張翁歎一聲︰「唉，總之一言難盡，我都唔知點講，特區領導人成日帶團遊大灣區，社會賢達又話大家係大灣區人，咁，即係點？」
香港消費單一 搭高鐵北上多玩意
今日天氣好咗少少，可能入秋，感覺係幾爽。「安仔，你幾時決定廣州四日三夜遊？試下五星級酒店下午茶，最好望住個廣州塔，一邊食葡撻一邊飲咖啡。」大師兄，唔係一定有葡撻，你不如去澳門啦。「大家都知，經過三年疫情，所有人都好掛住按摩、食火鍋之生活，香港係好，但消費幾單一化，搭高鐵就會海闊天空，上完廣州，下次去潮州汕頭，嘩，諗下都開心。」
我此刻無搭嘴，陷入了沉思，想到好多好多嘢。我有個朋友個細佬，原來已經一半住深圳一半住香港，「佢搭火車往返，兩邊都有生意。開頭唔多慣，依家準備睇下有無筍盤，實行北上置業。」大師兄話︰「我個世侄女好打得，幫間公司打拚，一個禮拜都要返上深圳、東莞兩至三次，佢話，點解唔諗下去中山買樓，因為中深通道好快通車，住中山個零鐘頭返到上環，總之就要北上啦，因為香港成千萬元一層樓，打工無可能。」
張翁一聽見大師兄講中港房地產話題，馬上又閘住︰「講呢啲，香港樓都有平價，住遠啲有得傾，例如住天水圍。」我心諗，對面就係福田，如果我後生，我會過去睇下啱唔啱住。不過，都係換個話題。我問香港有無計搞旺個夜市。「辰哥，你想特區變山東燒烤城？好似有少少九唔搭八。」我都費事駁你，飲杯啤酒消消熱氣。
「香港以前有個大笪地，不過係半個世紀之前，現在可以搞乜？」銀行偉睇個市幾淡，睇香港更加淡，唔知佢點解，算把啦，如果有乜睇唔開，又或者唔開心，真係返上去住啦，你搵埋咁多，都唔使做啦，周五落嚟同大家飲杯，周三中環飲茶，幾寫意。
「唉，內地樓市都幾麻煩，如果要買樓都係睇定啲先，辰哥，不如又諗下去泰國，四日三夜都OK，嗰邊都有樓盤參觀，講唔定都啱我有朝一日退休之選。」好，飲杯先再諗。
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
