小學外籍老師駐校成風

更新時間：18:08 2016-07-18
發佈時間：03:18 2001-01-19

　　(星島日報報道)上星期《星島日報》「家長雜誌」﹐刊登了華德小學聘用外籍老師教小六學生英語會話專題﹐以便為升中面試準備。Elsie認識一些家長﹐睇了報道後都很大反應﹐比較進取的家長更準備向子女所讀的學校反映意見﹐希望校方考慮增加這些課程。

　　其中住喺牛頭角樂華邨的羅太就主動向Elsie報料﹐話位於邨口附近的樂善堂楊仲明學校下午校﹐最近喺校舍向街的一面懸掛了一大幅橙紅色banner﹐列出今年度學校舉辦的八大項目﹐認真程度好似一些公司在年初籌劃的business plan﹐八大項目當中亦包括「外籍教師教授英語會話」。由於banner相當搶眼﹐唔少街坊行過都會望吓。

　　咁主動做推廣的小學真係少見﹐Elsie立刻致電該校校長霍少甜問吓詳情。霍校長告訴Elsie﹐教育署於去年批出一些撥款給各學校「拔尖補底﹐創造教學空間」﹐所以該校決定用這筆五十餘萬的新撥款﹐去發展課外活動﹐包括乒乓球、籃球、舞蹈及思維計畫等。霍校長坦言﹐就算學生學業成績不理想﹐但參加課外活動亦可增加自信﹐有助學業的發展。

　　至於「外籍教師教授英語會話」計畫﹐Elsie好奇問霍校長是否為小六生升中作準備﹐霍校長立刻帶笑表示根本冇考慮過呢個問題﹐佢話只係想在學校營造氣氛﹐讓學生見到外國人都懂得說話﹐現在的課程只提供予四至六年級的學生﹐讓他們每星期都可以上一堂由外籍老師教授的會話課
﹐若果成效好﹐今年九月新學期開始﹐將推廣至全校﹐讓所有學生均受惠。

　　Elsie讚霍校長有心思﹐掛一條這麼大的banner在校舍外﹐霍校長好謙虛咁話﹐學生的學業成績唔算標青﹐今學年籌辦有益家長及學生的課外活動﹐都希望家長及街坊知道。所以做一些推廣工作﹐以改善學校形象。

　　估唔到依家辦學也要顧及市場推廣﹐住喺將軍澳的林太也向Elsie報料話﹐區內的保良局甲子年中學都有在校舍掛起大型banner﹐公告天下佢哋中五學生會考中、英、數三科的及格率﹐同埋中七學生升大學的比率。Elsie認為這些資料令一眾街坊對學校的辦學成績更加清楚﹐增加透明度﹐
都算係一好榜樣。

　　年近歲晚﹐Elsie好似許多家長一樣﹐忙於購買年貨﹐準備送禮或自用﹐雖然支出都唔少﹐但話晒一年一次﹐無所謂啦﹗不過﹐嗰日同老公講﹐諗住買一些海味畀奶奶作賀年禮物﹐點知佢立刻提醒Elsie小心買到假年貨﹐話過年過節﹐畀人搵笨就唔好。

　　Elsie隨即致電專責掃冒牌貨的海關﹐希望拿些資料﹐海關新聞組的周小姐同Elsie講﹐去年海關都有接獲市民投訴參茸海味鋪的個案﹐被投訴的產品包括高麗參、燕窩、冬蟲草、魚翅、海底椰、鹿茸及髮菜等。周小姐話﹐好多參茸海味都難辨真假﹐市民最好到有信譽的商鋪購貨。

　　除了參茸海味﹐佢又提醒Elsie到年宵市場購物時要小心買到冒牌貨﹐去年海關巡查維園年宵市場時﹐拉了三個檔攤的檔主﹐並檢獲一千件冒牌家庭用品﹐所以今年海關都會部署類似的掃蕩行動。Elsie問周小姐﹐依家咁多翻版貨﹐又話冒牌朱古力﹐仲有唔少翻版卡通人物用品﹐對消費者
來講﹐真係好難定真假﹐周小姐就話﹐一個普遍定律是「平到唔合理」嘅貨品就要小心啦﹐市民如有疑問﹐不妨打佢哋廿四小時熱綫電話﹕2545 6182投訴。

　　若你有任何家長關心的話題﹐歡迎你報料﹐傳真﹕2799 8021或電郵 [email protected]。