劉江專訪｜33歲腦血管栓塞中風全身癱瘓因一原因希望太太先死：佢話我死板

更新時間：09:55 2023-04-13
發佈時間：09:55 2023-04-13

人稱「劉老師」的資深演員劉江自70年代投身幕前，曾演出超過200部電影及電視劇，戲裏戲外一直予人形象嚴肅，至10年前參演的TVB劇《拳王》遭惡搞一句「X！講呢啲」，令他在網上瞬間竄紅，還帶挈開拓年輕市場。喜歡與年輕人交手的劉江，最近於新晉導演何爵天執導的黑色喜劇《死屍死時四十四》罕有發揮搞笑本色，他與片中老伴Betty（黃文慧飾）之間既啜核又甜蜜的互動，更是令觀眾喜出望外！其實鏡頭背後，劉江不但幽默健談，也是一個不折不扣的好丈夫、好爸爸，早前受訪時一講起結婚50年的太太，他仲露出一副靦腆的幸福笑容，訴說晚年的夫妻點滴。

【點擊睇劉江從演之路】：

電影《死屍死時四十四》以幽默方式大談死亡與港人買樓悲歌，早在30多年前已「上車」的劉江細樓換大樓，最終買下元朗老牌豪宅錦繡花園，由於當年按息高達20厘，即使樓價比現在平一大截，他都不願再置業，「我覺得夠食夠住就OK，要供多間好辛苦，嗰時如果TVB份工一拍枱就冇㗎喇。」京劇出身的劉江曾效力佳藝、麗的和無綫，三年多前約滿離開服務38年的TVB，回想過去日夜顛倒的拍劇生涯，劇接劇的他33歲因過勞而腦血管栓塞中風，導致身體癱瘓，一度以為人生玩完，「嗰次中風我已經覺得世界末日，因為真係瞓喺度唔郁得，想舉高手都要揈上去。當時就諗如果我走咗，老婆咪嫁過第二個囉，但見到個仔望住我，我就喊，佢仲咁細將來點算呢？」於是憑着堅定的意志，劉江入院9日便奇蹟般康復。

起初病愈劉江也很注重健康，惜後來為供兒子到英國讀書，試過長期朝早拍劇夜晚配音，無限輪迴傾盡全力搵銀。如今年過40的兒子從事金融，劉江終可退下來享福，回復自由身的他近年大幅減產，一年約接拍一、兩套電影劇集過戲癮，其餘時間專注陪老婆遊山玩水，更一年去一至三次旅行，自認不夠浪漫的他笑說：「老婆話我死咕咕（指死板），我好鍾意留喺屋企，佢就話『你開工我已經喺屋企，而家你唔做嘢又喺屋企，咁算點呀』，所以有時休息都要規劃帶佢岀去。」

日日跑步拍拖凸腩變肌男

話雖如此，事實上劉江卻是口硬心軟的「暖男」。2015年，因發現血管鈣化需進行通波仔手術，令他再次提高健康意識，近來更獲周潤發（發哥）點醒，兩公婆從此展開跑步人生，「發哥同我講『你老婆70，你都70幾嘞，如果萬一要坐輪椅，邊個睇邊個？』，於是我就跟佢跑咗兩年幾，除咗打風落雨，日日跑，希望練好身體，一來要照顧太太，二來佢都唔使照顧我。」語畢76歲劉江即拎岀手機，Show off其大肚腩進化Fit爆身形的照片，還得戚地打趣道：「老婆成日叫我寫平安紙，但至今我都冇寫，因為我覺得我而家好健壯，哈哈！」

談到片中遇上生離死別的課題，問現實中可曾跟太太討論誰先行一步？劉江感性地說：「有時都會講吓，我希望太太走先，因為我可以照顧佢，大大細細嘅嘢我都可以幫佢處理，但如果我走咗，佢就要睇吓點搞。」至於後事安排，豁達面對死亡的他打算把骨灰撒落大海或草地，皆因認為形式不重要，最緊要一切在心中，「好簡單，我仔嚟睇我，我孫嚟睇我，再下一輩打後仲睇唔睇你呀？當你睇通咗呢個世界，其實你只係好小嘅微塵。」

採訪：黎寶倫
攝影：鄧國良
化妝：Yannis Yip
髮型：Louis Tse@Number 8 Salon