獎門人丨龍婷挑戰急口令似雞叫搞到顏志恒標汗肥媽投訴畀仔咬嘴

更新時間：18:30 2023-06-15
發佈時間：18:30 2023-06-15

為慶祝 6月18日父親節，TVB周六晚（17日）推出《獎門人 I Love爸爸感謝祭》，今集「獎門人」曾志偉帶領「獎老」阮兆祥、錢嘉樂、麥美恩、徐文浩和林秀怡，嘉賓陣容均來自《中年好聲音》，有「靠實力」隊的肥媽、周吉佩、李佳、林鉫徫、魏嘉信、李思林和劉智衛，對戰「衡車好聲音」隊的車婉婉、龍婷、顏志恒、支嚳儀、曹敏寶和梁浩銓。

【點擊睇《獎門人 I Love爸爸感謝祭》現場相】：

今集首個遊戲「開心無敵傳紫菜」笑料十足，肥媽、伍仲衡和車婉婉打頭陣出戰，肥媽起初捉住伍仲衡係咁啜，後來伍仲衡主動出擊捉番肥媽轉頭，場面爆笑。之後獎門人安排周吉佩、劉智衛和肥媽傳紫菜，豈料「蠱惑的紫菜」突然飛走，搞到肥媽和周吉佩咀了一啖，之後肥媽搞笑「投訴」兩位男士：「佢哋兩個都鍾意咬人嘅！」

到了「開心無敵估歌仔」戰況亦十分激烈，周吉佩、伍仲衡和魏嘉信瞓身搶咪撞埋一堆齊齊趴晒落地，最後由伍仲衡殺出重圍估中答案。小龍女龍婷在「開心無敵口噏噏」被超繞口急口令考起，由於她咯咯聲咁讀出「個個國家嘅國歌都係用嗰個國家嘅國家級歌星唱國歌嘅」，搞到負責估的顏志恒忍不住問：「係咪雞呀？」玩到瘋狂標汗的志恒，更要其他人出手幫忙抹汗。